Në nëntor të vitit që lamë pas, këngëtarja e cila është kthyer në kryefjalën e mediave, Selena Gomez, foli me zemër në dorë për periudhën e saj të vështirë për shkak të problemeve me shëndetin.
Ajo tregoi si e tallnin të gjithë për shkak të pamjes së jashtme, e cila ishte përkeqësuar për shkak të problemeve të saj shëndetësore.
Selena bëri një transplant veshke dhe qëndroi në rehabilitim, duke u kujdesur që t’i mbante siç duhet parametrat e trupit të saj dhe të mos abuzonte më me shëndetin.
“Më kanë tallur për herë të parë për trupin kur pata luhatje të peshës. Kisha lupus, probleme me veshkat dhe presion të lartë gjaku, ndaj duhet të përballsha me probleme të mëdha me shëndetin. Këtu e kuptova se sa ndikim kishte pamja e jashtme.
Për të qenë e sinqertë, luhatjet varen edhe nga muaji, por e kuptova atë që kishte ndodhur kur njerëzit nisën të më sulmonin. Asokohe më ndikoi shumë dhe më shqetësoi për një periudhë kohe.”- rrëfeu Selena asokohe.
Mirëpo, duket se këto ditë të vështira i kanë mbetur të shkuarës.
Tashmë, Selena Gomez është shëndoshë e mirë dhe madje në super formë!
Ajo ka pozuar për revistën e famshme “Dazed” me një set fotografik që duhet ta pranojmë se është bombë!
Këngëtarja shfaqet e veshur me një body që nuk e pengon të tregojë linjat sensuale, ndërsa ka dhënë edhe një intervistë frymëzuese për këdo që po kalon një periudhë të vështirë në jetë.
Selena shprehet se iu desh të kalonte gjërat që kaloi (përfshirë këtu edhe historinë e gjatë me Justin Bieber), për t’u bërë personi që është sot.
“Ka disa gjëra që kam dashur të mos më kishin ndodhur mua. Por, pa to nuk do të mund të isha zëri i njerëzve që kanë kaluar të njëjtën gjë. Për këtë jam shumë mirënjohëse për kapitujt e jetës time. Nuk po them që ka për të qenë e lehtë që tani e tutje, por kam më shumë forcë, kurajo dhe një zë më të fortë për t’u ngritur për gjërat që vërtetë meritoj.”- u shpreh këngëtarja.
https://www.instagram.com/p/B8MTVfljPCf/
https://www.instagram.com/p/B8MPpgsD6RF/
