Këngëtarja e “The Cranberries”, Dolores O’Riordan ishte “shumë e dëshpëruar” para vdekjes së saj të papritur në moshën 46-vjeçare. Kështu zbulojnë miqtë e këngëtares së njohur, e cila u gjet e vdekur dje, më 15 janar.
Ylli irlandez u gjet në një dhomë të hotelit “Hilton London” në orën 09:05 të së hënës, ndërsa policia ka thënë se shkaku i vdekjes është ende i “pashpjegueshëm”.
Vitin e kaluar, 46-vjeçarja zbuloi sesi ishte duke luftuar me depresionin dhe problemet e shëndetit mendor për pjesën më të madhe të karrierës së saj, pasi arriti kulmin në përpjekjen për t’i dhënë fund jetës në vitin 2013.
Ajo u diagnostikua me çrregullime bipolare në vitin 2015-n dhe gjithashtu foli për luftën me çrregullimet e të ngrënit, alkoolizmin dhe jetën mes abuzimeve që kishte kur ishte “një vajzë e vogël”.
Miqtë e këngëtares thanë se ajo ishte në depresion në javët para vdekjes, sipas TMZ. Ajo po vuante gjithashtu nga dhimbja e shpinës, që e kishte detyruar atë të anulonte koncerte për pjesën më të madhe të vitit 2017.
O’Riordan kishte tre fëmijë me ish-bashkëshortin Don Burton, një ish-menaxher i turneve për “Duran Duran”, me të cilin qëndroi e martuar për 21 vite.
Djali i tyre Taylor, 20 vjeç dhe vajzat Molly, 16 vjeçe dhe Dakota, 12 vjeçe, jetojnë me babanë e tyre në Kanada.
Fotografia e fundit e këngëtares është e dy javëve më parë me të dashurin.
Partneri i saj, muzikanti Ole Koretsky, postoi një foto të tyre në “Instagram” më 2 janar, ku shkruante se po pushonin dhe shikonin televizor me pizhame. Çifti ka qenë i lidhur dy vitet e fundit.
Personi i fundit që ka folur me të ishte një producent, i cili tha se këngëtarja kishte bërë shaka ndërsa bisedonin në telefon.
Burimi: Daily Mail
