Ministrja e Arsimit, Besa Shahini ka dhënë dy skenarët e përfundimit të vitit shkollor në 2020-n, tani që mësimi po bëhet online.
Me anë të një lidhje live në emisionin “Open” në Top Channel është shprehur se viti shkollor nuk do të shtyhet.
Shahini është shprehur se strukturat arsimore kanë dy opsione për mbylljen e këtij viti akademik, ku njëri opsion është përllogaritja e notave për pjesën para përhapjes së pandemisë në vendin tonë ndërsa opsioni tjetër është përmbledhja e vlerësimeve të mëparshme.
“Asnjë nxënësi nuk do t’i humbasë viti shkollor, jemi të bindur për ta mbyllur. Siç po bëjnë shtete të tjera. Nxënësit që ndihen se nuk kanë mësuar aq sa duhet mund ta përsëritin vitin sërish. Jemi të përgatitur për të mbyllur këtë vit. Kemi dy opsione. nëse kthehemi në shkolla të bëjmë vlerësimet e fundit apo opsioni i dytë nëse nuk kthehemi të bëjmë një përmbledhje sa kemi qenë në shkollë, pa u penalizuar ata që nuk kanë pasur mundësi online. Kemi parë me kujdes shtete e tjera”, tha Shahini.
