Ministrja e Arsimit, Rinisë dhe Sportit, Lindita Nikolla, ka njoftuar se së shpejti do të futet edhe gjuha rome në sistemin arsimor shqiptar.
Gjatë një forumi ku u diskutua mbi arsimin gjithëpërfshirës, Nikolla nuk dha asnjë shpjegim sesi do të funksionojë mësimi i gjuhës rome, por tregoi se do të përfshijë edhe universitetet.
“Së shpejti do mundësojmë gjuhën rome në sistemin tonë arsimor. Puna që kemi bërë ka të bëjë edhe me universitetet. Mësuesit ndihmës jo të gjithë janë të mirëtrajnuar, ndaj kemi nxitur universitetet të kenë programe për nevojat e kohës dhe me modulet më të mira.” – tha Ministrja e Arsimit, Rinisë dhe Sportit, Lindita Nikolla.
Ndër të tjera, Ministrja njoftoi se në shkollat e vendit këtë vit do të ketë 700 mësuesë ndihmës dhe kërkoi nga mësuesit që të plotësojnë pritshmëritë e nxënësve.
“Mësuesit ndihmës këtë vit bëhen 700. Jam e mbushur me më shumë arsye që këto mësues të mos jetë prania fizike e tyre por të realizojnë pritshmëritë e prindërve. E kemi të nevojshme të bëjmë trajnime dhe puna e mësuesve të matet me progresin e fëmijëve që bëjnë në klasa. Kemi vullnet dhe dëshirë për të listuar problematikat që ne kemi. Çdo ditë të punës tonë ta keni me ne në zyrat tona për të përmirësuar shërbimet ndaj kësaj kategorie. Arsimi gjithëpërfshirës do të ketë fokus deri në hierarkinë më të lartë në Ministrinë e Arsimit.” – përfundoi Ministrja e Arsimit, Rinisë dhe Sportit, Lindita Nikolla.
