Viti shkollor do të mbyllet në fund të vitit akademik.
Këtë e ka bërë të ditur vetë Ministrja e Arsimit, Besa Shahini e cila ka deklaruar se shpreson shumë që të mos shtyhen provimet e maturës shtetërore.
Përmes një video-mesazhi ku iu përgjigj disa pyetjeve, Shahini adresoi edhe një shqetësim në lidhje me një video të rreme, e cila ka qarkulluar kohët e fundit dhe ka krijuar përshtypjen se viti shkollor do të përfundojë më herët.
“Kjo është një video e rreme që është krijuar duke këputur një prononcim timin ku flas për mbylljen e vitit shkollor. Që të mos kemi dilema, viti shkollor mbyllet në fund të vitit akademik, në fund të semestrit të tretë, dhe shpresojmë vetëm që nuk do të jemi të detyruar të shtyjmë datat e përfundimit të vitit shkollor, të shtyjmë datat e maturës”, sqaron ajo.
Në lidhje me pyetjen nëse mësimi do të vijojë online nëse shkollat nuk do të hapen më 6 prill, ministrja Shahini tha se mësimi online do të vijojë deri sa situata të kthehet në normalitet.
Shahini u shpreh se shpreson që të jetë 6 prilli dita e fillimit, por ky vendim do të merret nga task forca e ngritur për koronavirusin.
“Patjetër. Ne po përgatitemi që të vazhdojmë me xhirimet e leksioneve edhe për javët pas 6 prillit, përkundër që nuk është marrë ende vendimi nga Task Forca për koronavirusin nëse shkollat do të qëndrojnë mbyllur përtej datës 6 prill apo jo. Pra nga mesi i javës që vjen, ne do të shohim situatën, do të marrim parasysh risqet dhe do të marrim një vendim për hapjen ose jo të shkollave me datën 6 prill”, shprehet ajo.
