Studentët e Fakultetit të Drejtësisë që duan të bëjnë mësim do të zhvendosen në ambiente të tjera.
Ky është vendimi i Ministrisë së Arsimit, paskërkesës së disa studentëve drejtuar dekanit, Artan Hoxha.
Ata kërkuan rifillimin e mësimit për të mos humbur vitin akademik dhe ai i kërkoi Ministrisë së Arsimit ambiente të tjera që ata të rifillojnë shkollën.
Shumë studentë të tjerë vazhdojnë të ngujohen në ambientet e fakultetit. Ata shprehen të vendosur për të vijuar protestën e tyre deri në plotësimin e kërkesave të tyre.
Ndërsa në disa fakultete si tek Histori-Filologjia dhe Shkencat Sociale nuk bëhet fare mësim.
Ndërkohë, studentët e Inxhinierisë së Ndërtimit dhe Arkitekturës po mbajnë një peticion për shfuqizimin e ligjit të arsimit të lartë.
Ata po mbledhin firmat e studentëve, ndërsa peticioni do të përhapet në të gjitha fakultetet.
