Pasiguria për fëmijët për shkak të mosmarrjes së masave dhe papërgjegjshmërisë së institucioneve për Covid-19, po merr përmasa të frikshme.
Ndërkohë që mësojmë që dita-ditës po rezultojnë pozitivë anëtarë të stafeve pedagogjike nëpër institucione shkollore dhe parashkollore, ky fakt duket sikur bie në vesh të shurdhër tek instutcionet kompetente.
Mbi propagandën qeveritare, së pari duhet të jetë primare shëndeti i fëmijëve, që janë e ardhmja e vendit.
Vetëm pak më parë, përveç mbylljes së kopshtit 41 në Tiranë, ku ishin të infektuara drejtoresha dhe një sanitare, edhe në çerdhen “Donika Kastrioti” në Berat, dy edukatore kanë rezultuar me Covid-19.
Si pasojë çerdhja është mbyllur, por a është kjo një zgjidhje?
Qeveria dhe Ministria e Arsimit, duhet të ndërmarrin masa imediate në lidhje me strategjinë e ndjekur në institucionet arsimore, sepse kjo neglizhencë dhe papërgjegjshmëri, rrezikon që të krijojë vatra masive të cilat do të jenë të pamundura të menaxhohen më pas.
Bëhet me dije gjithashtu se edhe shkollat 9-vjeçare në Vodicë dhe në Poliçan janë mbyllur, pasi 4 mësues në këto shkolla kanë rezultuar pozitivë me Covid-19./Iconstyle.al/
