Më shumë se sa si një televizion publik me transmetime cilësore, RTSH-ja do të shquhet gjithmonë si institucioni i skandaleve të mëdha. Dhe nëse kërkojmë t’ja vëmë fajin dikujt, dalim gjithmonë tek emri i Thoma Gëllçit.
Drejtori i Përgjithshëm i RTSH-së është shquar gjithmonë për abuzimet e bujshme me taksat e shqiptarëve. Që pas mbarimit të Festivalit të 58-të, “iconstyle.al” ndoqi hap pas hapi mungesën e transparencës për mënyrën se si janë shpenzuar më shumë se 41 milionë lekë nga buxheti për realizimin e këtij spektakli. Thoma Gëllçi nuk na dha kurrë një përgjigje për këtë çështje dhe po ashtu as institucione të tjera si Komisioneri për të Drejtën e Informimit. (KLiKO KËTU)
Po bëhet thuajse 1 vit nga organizimi i Festivalit dhe më në fund RTSH-ja e ka bërë publike listën e shpenzimeve, duke deklaruar në total rreth 40 milionë lekë, më pak nga ç’u raportua në media. Duke qenë se u desh një kohë kaq e gjatë për përpilimin e një liste të tillë, të gjithë e kuptojmë se sa e lehtë është të vendosen disa shifra fiktive dhe të fshehësh të vërtetën.
Një tjetër skandal abuzimi me taksat e shqiptarëve
Festivali i 58-të nuk është i vetmi skandal që lidhet me Gëllçin e RTSH-në dhe që duhet t’i shqetësojë jo pak qytetarët. Në qershor të këtij viti, RTSH-ja shiti si një lajm të jashtëzakonshëm për të gjithë shqiptarët faktin se ndeshjet e UEFA Champions League do të transmetoheshin falas në këtë televizion. Por entuziazmi i Thomait për “ndeshjet e sigurura” nuk zgjati shumë. Platforma private, Tring, zbuloi se të drejtën e transmetimit të plotë të kompeticionit do t’i kenë vetëm ata, ndërsa RTSH-ja do të transmetojë vetëm 18 ndeshje nga 138-të të tilla. Megjithatë mashtrimi më i frikshëm nuk qëndron pikërisht këtu, por tek fatura e majme që ka paguar Gëllçi nga taksat e shqiptarëve për të blerë ndeshjet nga UEFA.
3.2 milionë euro për 18 ndeshje futbolli
RTSH-ja njoftoi se do të transmetonte ndeshjet e Champions League për sezonin e ri 2021-2024 përmes një lajmi, për të cilin nuk e dimë nëse duhet të qajmë apo të qeshim më parë. Në të thuhej se transmetuesi publik kishte bërë një sakrificë të madhe financiare për të parakaluar operatorët privatë dhe për t’ju siguruar shqiptarëve Ligën e Kampionëve pa asnjë pagesë shtesë.
RTSH-ja dhe Thoma Gëllçi ju hodhën hi syve gjithë shqiptarëve duke thënë se nuk do të kenë tarifë shtesë për ndeshjet, kur në të vërtetë nga taksat e tyre u sigurua blerja e paketës së Champions League.
Fatura që është paguar për kampionatin ka shkuar në total plot 3.2 milionë euro. RTSH-ja ka paguar 600 mijë euro në vit për paktën pa pagesë të ndeshjeve dhe duke e shumzuar në 3 (për 3 sezonet e Champions League) dalim në përfundimin se janë paguar 1.8 milionë euro. Por llogaria nuk mbyllet me kaq, sepse për transmetimin e ndeshjeve duhet paguar edhe sinjali ndërkombëtar satelitor, që sipas specialistëve kostot teknike për një ndeshje arrijnë në 25-30 mijë euro. Nëse merret një shumë prej 26 mijë eurosh për ndeshje, do të dalim në përfundimin se Thoma Gëllçi ka paguar 3.2 milionë euro për 18 ndeshjet e Ligës së Kampionëve.
Siç duket Gëllçi është i vendosur të vazhdojë abuzimet dhe për sa kohë në këto skandale kanë dorë edhe njerëz të tjerë me më shumë pushtet, nuk është çudi që një muaj më vonë të dëgjojmë ndonjë bëmë tjetër nga RTSH-ja jonë.
