Progresi për barazinë gjinore po ndodh, pavarësisht se vazhdojnë debatet e hapura për pagesën e pabarabartë. Por për Mila Kunis, “Ndryshimi nuk po vjen aq shpejtë mjaftueshëm për të ndihmuar miqtë e mi, kolegët e mi, apo edhe fëmijët tanë”.
Aktorja rihapi debatin e seksizmit në “Hollywood”. Mila Kunis tregoi se disa vite më parë, një producent filmash e kishte urdhëruar të pozonte gjysmë nudo në një revistë meshkujsh për të promovuar një film. Kur ajo kishte refuzuar, producenti e kishte kërcënuar se do t’i shkatërronte karrierën, duke i thënë se, “ajo nuk do të punonte kurrë më në atë qytet”.
Në një letër të hapur të publikuar në portalin “A Plus”, Kunis rrëfeu se ishte ndier tërësisht e pavlerë dhe e trajtuar si një objekt. “Përgjatë karrierës sime, ka pasur momente në të cilat jam ofenduar, anashkaluar, paguar më pak nga ç’më takonte, injoruar nga ana kreative dhe “zvogëluar” për shkak të gjinisë sime”, tha ylli i kinemasë.
Një tjetër episod që i ka lënë asaj një shije të hidhur, ishte ai i shkëmbimit të disa email-eve me disa producentë me rëndësi, njëri prej të cilëve e kishte cilësuar atë vetëm si “bashkëshorten e Ashton Kutcher dhe nënë e fëmijës së tij”. “Ai i minimalizoi vlerat e mia në të qenit thjesht gruaja e një burri të suksesshëm dhe e aftë për të mbajtur fëmijët e tij”, u shpreh e zhgënjyer 33-vjeçarja.
Burimi: Harper’s Bazaar
