Vdekja e të riut Lear Kurti është ende enigmatike. I riu u shoqërua asokohe në komisariatin e policisë dhe që nga atëherë, institucionet binin në kundërshti me njëri-tjetrin përmes deklaratave pas vdekjes se tij.
Mirëpo, së fundmi, një mik i të ndjerit ka dhënë një intervistë për emisionin “Piranjat”, ku zbuloi disa detaje lidhur me të riun.
Ai tha se shoku i tij i ndjerë u dhunua në mënyrë mizore në makinën e policisë.
Zyhdi Spahiu, 36 vjeç ka treguar për “Piranjat” se ai po vëzhgohet gjatë gjithë kohës nga policia.
Ai ka treguar se më 2 nëntor, policia e ka ndaluar pasi e ka kapur në mjet në gjendje të dehur. Mirëpo, ai kishte treguar se kishte marrë diçka për të ngrënë në një “fast food” tek rruga e Durrësit.
“Këta me doemos duan diçka që të kapen me mua duan të dinë ca bëj, ca ha, ca pi, ku fle, çdo gjë. Mundohen të më mbyllin gojën, por mua nuk do të ma mbyllin gojën. Unë do t’i shkoj deri në fund kësaj”, theksoi ai.
Kur u shoqërua në rajonin e policisë, Spahiu ka treguar se i njëjti person që ka qenë kur ai ka bërë një deklaratë për Learin i ka thënë: “ça i ke bërë vetes me këtë deklaratë, do të dalë nga hundët”.
“Ligji është i barabartë për të gjithë. Ke bërë një krim do marrësh dënimin, siç mbaj unë përgjegjësi. Kam bërë një krim, kam vuajtur dënimin. Shpresoj që ata të marrin dënimin e duhur sepse vëllanë tim, Learin nuk e kthejmë dot më”, shtoi ai.
Jo vetëm kaq por ai tha se nuk do ta mbyllë aspak gojën e do të kërkojë drejtësi për mikun e tij të ndjerë.
“Këto kot lodhen, unë gojën nuk do e mbyll. Edhe mbas 10 vjetësh unë këtë version do kem. Ata të tre, ata maskarenj do të marrin dënimin e merituar. Vëllai im ka ikur në tokë, nuk kisha mundësi ta shpëtoja, por të paktën drejtësia të vihet në vend. Nëse duam të bëjmë drejtësi. Nëse s’duam të bëjmë drejtësi, me keqardhje e them që nesër mund të gjendem edhe unë i vdekur”, tha ndër të tjera 36-vjeçari.
