Dhembja përfshiu dy familjet e të rinjve, që u ndan nga jeta në mënyrë tragjike mbrëmjen e së hënës, këngëtarit Ergi Dini dhe shokut të tij, Kejdi Halili.
Artistët dhe të njohurit nuk reshtin së shprehuri dhembjen dhe ngushëllimet familjeve. Motorin e drejtonte Kejdi, i cili kishte shkruar dikur shprehjen e aktorit Paul Walker, që është ndarë nga jeta në mënyrë të parakohshme me një aksident automobilistik: “Nëse një ditë shpejtësia më vret, mos qani sepse isha duke qeshur”.
Por për familjen dhe të afërmit e tyre është e pamundur të mos qajnë sot!
Kejdi ishte djali i vetëm i gazetares, e cila ka gjithashtu edhe një vajzë më të vogël. Kejdi dhe Ergi, përkatësisht 21 dhe 22 vjeç, nuk mundën t’u mbijetonin plagëve pas rrëzimit nga motori. Por, historia e trishtë e djemve, dukej sikur mund të ishte shmangur.
Një ditë më parë, Kejdi kishte nxjerrë një njoftim në internet ku shkruante se kërkonte ta shiste motorin. Targa e objektit të nxjerrë në shitje përkon me atë të publikuar nga autoritetet policore që ndodheshin në vendngjarje. Mirëpo, ironia e fatit deshi që pak orë më vonë, ky mjet të merrte jetën e dy të rinjve.
