Është identifikuar viktima e atentatit që ndodhi mbrëmjen e djeshme në Tiranë, në zonën e “Porcelanit”.
Santiago Malko është një ish-efektiv policie, që dikur ka shërbyer në radhët e policisë së Shtetit dhe më pas është përjashtuar.
“Shqiptarja.com” mëson se Malko rezulton të jetë mik i ngushtë dhe me Ervis Martinaj, biznesmenin e lojërave të fatit. Malko njihet si i përfshirë në disa ngjarje me armë në Tiranë si ajo e 4 tetorit 2018, ku mbeti i plagosur Ervis Martinaj, Elio Hato dhe i vrarë Fabian Gaxha.
Ndërkohë ngjarja tjetër ku ai është përfshirë në këtë veprimtari kriminale ka ndodhur në prill të 2016 për një borxh me dy vëllezërit Edmond dhe Gentian Lashi.
Deri më tani, policia bën me dije se një person i identifikuar si D., A., është shpallur në kërkim si i dyshuari kryesor i vrasjes së ish-policit.
Atentati dyshohet të ketë ndodhur për motive hakmarrjeje, e ndërsa mësohet se autorët kanë qëlluar me 10 plumba viktimën, duke e lënë të vdekur në vend.
