Botërori i Katarit është cilësuar më i shtrenjti i të gjitha kohërave dhe kjo për shak të investimeve të mëdha në stadiume si dhe për të garantuar sigurinë e tifozëve dhe gazetarëve.
Por pavarësisht kësaj, një gazetare argjentinase Dominique Metzger ka rënë pre e grabitësve në Katar.
Ajo e ka bërë publike ngjarjen në rrjetet sociale, duke raportuar se ka qenë viktimë e një grabitjeje teksa po bënte një transmetim të drejtpërdrejtë në zonën e fansave. Shumë nga sendet e saj personale u vodhën, duke përfshirë portofolin, i cili përmbante shumë dokumente të rëndësishme si identitetin e saj.
Ajo ka rrëfyer eksperiencën live në TV: “Sapo më vodhën portofolin kur bënim transmetimin live. Policia më dërgoi këtu për të bërë kallëzim. Dokumentet dhe kartat janë ato që më shqetësojnë më shumë. Por, do të shohim se çfarë do të ndodhë. Përvojat që ju nuk prisni t’i jetoni, ndodh që ti përjetojmë”.
Dominique gjithashtu raportoi incidentin përmes llogarisë së saj në Instagram. Autoritetet i kanë premtuar se do t’ia kthejnë të gjitha sendet e humbura gazetares argjentinase.
Kupa e Botës në futboll ka nisur ditën e djeshme në Katar, ku ndeshja e parë ishte ajo mes Ekuadorit dhe Katarit. Ndeshja u fitua nga kombëtarja e Ekuadorit, ndërsa vijojnë ndeshjet e tjera të kombëtareve të tjera.
