“Njerëzit shohin veten tek ajo. Një nënë e dedikuar, një mike e mirë dhe dikush që nuk ka frikë të bëjë humor herë pas here”. Kështu e ka cilësuar Presidenti në ikje, Barack Obama, bashkëshorten e tij Michelle, në një artikull për revistën prestigjioze, “Vogue”.
Michelle nuk ka kërkuar asnjëherë të bëhet Zonjë e Parë, thotë Obama:
“Ashtu si shumë gra politikanësh të tjerë, ky rol i erdhi menjëherë asaj. Por unë e dija gjithmonë që ajo do të ishte e pabesueshme në këtë rol dhe do t’i vendoste vulën e saj unike. Kjo sepse ajo është ajo që shihni, gruaja e këndshme, briliante, që për çfarëdo arsye pranoi të martohej me mua”.
Pasi i përshtati dy vajzat e saj me ambientin, avokatja e arsimuar në Harvard u përqendrua në mbështetjen e familjeve ushtarake dhe ushqimin e shëndetshëm. Nga mesi i mandatit të dytë, ajo u bë më ambicioze, duke nisur dy iniciativa të arsimit, “Shko sa më larg” dhe “Lërini vajzat të mësojnë”. Gjatë vitit të kaluar ajo u kthye në një nga Zonjat e Para të Kulturës Popullore, një nga gratë më joshëse në botë- e admiruar nga të rinjtë dhe gjyshet falë instinkteve të guximshme të modës.
Sa i përket largimit nga Shtëpia e Bardhë pas përfundimit të mandatit, Michelle Obama tregon se do ta marrë malli për kohën që ka kaluar aty:
“E dini, ka disa momente… Edhe sot po shikoja pamjen jashtë. Pamja nga Lëndina e Jugut dhe Monumenti i Uashingtonit, ku sapo kishte rënë shi dhe bari ishte me të vërtetë i gjelbër, është kaq bukur. Dhe për një moment mendova, unë do ta humbas zgjimin kështu. Por, në anën tjetër. . . është koha. Unë mendoj se demokracia jonë është saktësisht e drejtë: dy mandate, tetë vjet. Kjo është e mjaftueshme. Për shkak se është e rëndësishme që të kesh një këmbë në realitet, kur ke qasje në këtë lloj pushteti. Natyra e jetesës në Shtëpinë e Bardhë është e izoluar. Dhe unë mendoj se Barack dhe unë, duke qenë se jemi pak kokëfortë, kemi ruajtur normalitetin, kryesisht për shkak të moshës së fëmijëve tanë. Unë shkoj jashtë për darkë me shoqet e mia; shkoj në lojëra me Sasha-n; Barack luan basketboll në ekip me Sasha-n.? ”
Burimi: Vogue
