14 shtatori përkon me nisjen e një sfide të re për të gjithë nxënësit dhe mësuesit e vendit. Ata duhet të rikthehen pranë institucioneve të tyre të arsimit në mes të frikës nga pandemia.
Për t’u ruajtur nga ndonjë infektim i mundshëm me Covid-19, nxënësit dhe mësuesit duhet të ndjekin një udhëzues të përpliuar nga Ministria e Shëndetësisë, që duket se nuk është i qartë për askënd.
Fabiola Hoxha, mësuese në gjimnazin “Ismail Qemali” në kryeqytet ka treguar se shkollat në vend janë në një kaos të vërtetë.
Gjatë një interviste për “ABC News” ajo është shprehur se mësuesit nuk kanë gati një program të mirëfilltë nga ministria se si duhet të veprojnë në këtë situatë.
“Jemi duke nisur një vit me maska, që po reflekton heqjen e maskave të propagandës qeveritare. Jemi duke nisur vitin shkollor, por në një situatë kaosi. Jemi ne mësuesit në kaos, në enigmë të plotë.
Kemi grafiqe të bukura me ngjyra, harta, ndarje, por realisht nuk kemi një program të qartë. Udhëzimi na vjen me tre skenarë.
Skenari i parë ai që besoj unë, do të donte që të ndodhet në një fillim viti brenda klasës me mësim normal. Pastaj kemi një alternim të mësimit në klasë dhe online, dhe më pas ajo që të mos ndodhë të tërhiqemi për mësim online.
Drejtuesve të shkollave u ka ardhur një mesazh interesant, ku presupozohet që 14 shtatori të jetë një ditë feste. Unë nuk arrij ta kuptoj. Jemi në një situatë të tillë, të maskuar. Jemi përballë tre skenarëve dhe duhet të përpunojmë informacionin. Mësuesi është në një pikëpyetje të madhe. Nëse unë nuk referoj siguri, si do ia transmetoj fëmijës”, është shprehur mësuesja.
Akoma më i rrezikshëm është fakti se asnjë mësuesi nuk i është marrë tamponi për të kontrolluar nëse janë apo të prekur me Covid, edhe pse shkollat do të hapen nesër. Hoxha ka treguar se arsimtarëve ju është komunikuar se do të testohen, por deri më tani nuk ka ndodhur diçka e tillë.
Nga ana tjetër një nga shkollat e inaguruar së fundmi nga kryebashkiaku Erion Veliaj, “Jeronim De Rada” është përfolur se është kthyer në një vatër të nxehtë të koronavirusit.
Sipas denoncimeve të ardhura pranë Partisë Demokratike, në këtë shkollë 10 mësues janë prekur nga Covid-19, që nëse është e vërtetë, do të thotë se kemi të bëjmë me një situatë vërtetë shumë alarmante.
Ndërkohë pas gjithë këtyre reagimeve Ministria e Arsimit vazhdon të heshtë dhe të jetë e palëkundur në vendimin për të rikthyer nxënësit e mësuesit në shkollë, duke e ditur se nuk ju ka siguruar as kushtet më minimale për t’i mbrojtur nga virusi.
