Një nga hobet më të fundit të të rinjve shqiptarë është eksplorimi i natyrës. Nuk do të thotë që të jesh tip aventurier, por të paktën mos të jesh nazeli dhe të çmendësh grupin me ankesa si, “u lodha” apo “më hahet bukë”.
Ne u bëmë katër vajza me dëshirën për të bërë diçka ndryshe këtë fundjavë me pak shpenzime. Dilema se ku të shkonim ishte një histori më vete derisa zgjodhëm të bashkoheshim me guidat për të eksploruar një nga bukuritë më të përfolura së fundmi që ndodhet në Tiranë, të njohur si “Syri i Cikllopit”.
Në guidë shkruhej se vështirësia e udhëtimit është mesatare, por para se ta merrni këtë udhëtim duhet të lexoni këtë artikull për gjërat që duhet të dini dhe do të doja që dikush ta kishte shkruar për mua.
1.Rruga NUK është e lehtë
Nëse do ta vizitoni këtë destinacion për herë të parë duhet të dini që terreni nuk është aq i lehtë sa mendoni. “Syri i Cikllopit”, ose siç i thonë ndryshe “Gjurma e Ciklopit”, ndodhet rreth 4 km poshtë Kërrabës, në fshatin e quajtur Skëterrë, në luginën e lumit Erzen. Ai është rreth 20 m i gjerë dhe 120 m i thellë si një perlë e fshehur në grykën e Kërrabës.
Deri në fshatin Skëterrë mund të shkoni me makinë, pastaj pjesën tjetër duhet ta bëni më këmbë për shkak të terrenit të vështirë, por edhe për t’iu dhënë mundësinë që të shijoni sa më shumë bukuritë natyrore. Për të arritur deri në destinacion duhet të ecni rreth 1 orë e 30 minuta me këmbë në një ngjitje dhe pjerrësi.
2.MOS e merr fëmijën me vete
Okej, do të thoni ku t’i lëmë fëmijët? Atëherë më mirë të zgjidhni një tjetër destinacion turistik, në mënyrë që të mos torturoheni as ju dhe as fëmija.
Në grupin tonë bënte pjesë edhe një grua, e cila kishte marrë vogëlushin e saj rreth 3-4 vjeç. I gjithë udhëtimi i saj ishte me të në krah, çantën e shpinës dhe një qese me ushqime në dorë. Mund ta kuptoni lodhjen e saj!
3.Mos u ngarko
E gjithë eksperienca deri në kthim zgjat vetëm 7 orë dhe nëse nuk jeni shumë llupës atëherë ju mjaftojnë vetëm këto ushqime: një sanduiç, 2-3 kokrra fruta të ndryshme, fruta të thata dhe 1 shishe ujë.
Mos bëni gabimin tonë të merrni 5 sanduiçe dhe nga 2 kg fruta, pasi jo për gjë por e gjithë pesha do të jetë në kurrizin tuaj.
4.Mos shko me shapka
Ky është një nga gabimet më të mëdha: të shkosh me shapka në një udhëtim ku të duhet të ecësh gjithsej 3 orë. Dy gjëra do t’ju ndodhin: shapkat do t’ju këputen dhe këmbët do t’ju bëhen copë. Kështu që mos thoni që s’ju paralajmëruam.
5.Merr rroba banjë dhe peshqir
Po, aty keni vend të merrni rreze dielli dhe të freskoheni duke u larë. Kështu që këto dy gjëra ju duhen patjetër, ndryshe ose do të dilni me të brendshme, ose do t’ju bëhen shenjat e bluzës apo kanotierës.
6.Fotot s’kanë lidhje me atë që do të shihni
Në fotot që qarkullojnë kudo nëpër internet shihni ujin e kristaltë të liqenit, i cili është deri në 100 metër thellësi. Por në rastin tonë nuk ishte ashtu. Kur më në fund arritëm në destinacion të djersitura dhe me dëshirën për t’u freskuar, ajo që pamë ishte uji ngjyrë gri. Arsyen na e thanë banorët e zonës në kthim. Ato treguan se mbi grykën e derdhjes po bëhen punime dhe të gjithë dherat kalonin në liqen:
Një tjetër gjë që nuk të shpëtonte pa u vënë re nga ne ishin mbeturinat. Shumë persona të tjerë që kishin ardhur si ne, i kishin vendosur mbeturinat pasi ishin ushqyer kudo ku kishin gjetur mundësi.
Rikthimi në shtëpi
Pavarësisht se mund të ishin të lodhur dhe me disa dhimbje të vogla në këmbë, udhëtimi ia vlejti pasi:
1.Eksploruam një vend për herë të parë
2.Njohëm njerëz të rinj
3.Morëm pak ngjyrë
4.Bëmë pafund fotooo
5.Shpenzuam vetëm 1.000 lekë gjithsej. (Epo në fund të ditës duhet të bësh disa llogaritje!)
Shënim: Në fund të udhëtimit ju këshillojmë të mblidheni për një kafe, kështu do të flisni për kohën e kaluar dhe si e përjetoi secili. Por më e rëndësishmja të shpërndani fotot! 🙂
Burimi: Iconstyle.al
