Më 2 nëntor nisi viti i ri akademik 2020-2021, por këtë vit ndryshe nga çdo herë tjetër, pasi studentët u përballën me mësimin online për shkak të pandemisë.
E ndonëse të gjithë ishim të vetëdijshëm se kjo ishte e pashmangshme, ministria e Arsimit, apo vetë universitetet nuk ndërmorën asnjë veprim apo plan konkret për të shmangur kaosin e krijuar javën e parë, e që po vijon ende edhe në këtë javë të dytë. Dhe pasojat e këtij vendimi ndjehen jo pak tek studentët.
“Qëndresa Qytetare” ka zhvilluar së fundmi një sondazh lidhur me ecurinë e mësimit online në Universitete dhe rezultatet lënë shumë për të dëshiruar, ndonëse ishin të pritshme nëse marrim parasysh faktin se atyre nuk iu është krijuar asnjë lehtësi nga shteti!
Përfundimet e sondazhin tregojnë shumë mangësi!
– Sipas të dhënave të mbledhura, 77.5% e studentëve e ndjekin mësimin online nëpërmjet telefonit, 20.5% nëpërmjet laptopit ose kompjuterit dhe vetëm 2% e aksesojnë mësimin nga tabletat e tyre.
PASOJA 1: Nisur nga mundësitë e pakta që ofron telefoni celular për të aksesuar dokumenta dhe për të ndërvepruar me detyra kursi, mund të themi që pjesa më e madhe e studentëve janë të kufizuar në pjesëmarrje cilësore në mësimin online.
– Bazuar në të dhënat e sondazhit 50.6% e studentëve shpenzojnë 20 euro në muaj për internet, 30.5% e tyre shpenzojnë 10 euro ndërsa 18.9% e studentëve shpenzojnë mbi 30 euro për të blerë internet me qëllim ndjekjen e mësimit online. Nga ana tjetër asnjë nga 9 universitet publike nuk ka bërë reduktim të tarifës së studimit pavarësisht reduktimit të kostove administrative që kanë pasur.
PASOJA 2: Studentët po shpenzojnë më shumë seç duhet dhe po marrin shumë më pak seç po shpenzojnë. Ndonëse prej fillimit të mësimit online në mars 2020 “iconstyle.al” i është bashkuar kërkesës së studentëve dhe ka kërkuar që Interneti tu jepet falsat, sigurisht që qeveria nuk ka ndërmarrë asnjë veprim. E njëjta gjë vlen edhe për tarifat vjetore, që ashtu si vitin e kaluar, edhe këtë vit akademik do paguhen të plota ndonëse studentët nuk po e frekuentojnë asnjë ditë auditorin.
– Pjesëmarrja mesatare e studentëve në seminare dhe leksioneve në 9 universitete publike është në masën 60%. Ndërkohë që 38.5% e studentëve janë shprehur se nuk janë respektuar oraret gjatë mësimit online. Studentët e Universitetit Bujqësor të Tiranës e kanë ndjekur mësimin online në masë më të madhe 79%, ndërsa studentët e Universitetit “Aleksandër Moisiu” e kanë ndjekur mësimin online në masën më të vogël me vetëm 39%.
PASOJA 3: Padyshim që mungesa e studentëve në leksione e seminare do shkaktojë boshllëqe e probleme të shumta, që përveçse me diplomimin, lidhen edhe me profesionin e tyre. Sigurisht kjo mungesë pjesëmarrjeje në pjesën më të madhe nuk lidhet me dëshirën, por mundësitë. Sikundër e përmendëm edhe më sipër mungesa e Internetit dhe kostotat e larta e pamundësojnë pjesëmarrjen në mësim.
– Studentët e 9 universiteteve publike e kanë vlerësuar me notën 6 efektivitetin e mësimit online, me notën 7 – 8 gatishmërinë e pedagogëve dhe me notën 5 – 6 shërbimin e ofruar nga sekretaritë e fakulteteve, duke shënuar kështu një diferencë mes shërbimeve të cilat ata paguajnë drejtpërdrejtë me tarifat dhe shërbimit të pedagogëve të cilët mbulohen nga buxheti i shtetit.
PASOJA 4: Mungesa e një strategjie të mirëpërcaktuar nga institucionet ka sjellë tek studentët zhgënjim, zhvillim mësimi me programe që muk mundësojnë gjithëpërfshirjen, leksione aspak aktive dhe mbi të gjitha shumë pak efektivitet.
Çfarë masash të menjëhershme nevojiten?
Së pari, studentëve dhe nxënësve duhet t’u krijohet mundësia që t’u jepen falas tabletat apo laptope si dhe interneti cilësor. Vetëm në këtë mënyrë mësimi do jetë gjithëpërfshirës dhe nuk do krijojë boshllëqe.
Së dyti, studentët nuk duhet të paguajnë(të plotë) tarifën vjetore. “iconstyle.al” prej kohësh e ka ndjekur me shqetësim këtë çështje, pasi kur viti akademik po zhvillohet online, atëherë përse studentët duhet të paguajnë të njëjtin çmim tarife si në kushte normale? Duke qenë se platformat online kanë edhe koston e tyre shtesë për pagesën e internetit në shtëpi, studentët nuk duhet të paguajnë tarifën e plotë studimor.
Së treti, ashtu siç edhe QQ sugjeron, nevojitet ndryshimi i ligjit 80/2015 duke parashikuar “distance learning” si një nga format e mësimdhënies në arsimin e lartë.
