Është njoftuar tashmë se në pak javë do të nisë viti i ri shkollor, e megjithatë duke qenë se jemi në kulmin e pandemisë së koronavirusit, janë shumë gjëra që na shqetësojnë!
Kthimi në shkollë në vitin 2020 nënkupton një hendek më të madh midis mësimdhënies, të mësuarit dhe sigurisë. Qëllimi kryesor është të krijohet një ambient i sigurt për nxënësit, studentët dhe stafin akademik, me plane të qarta që zgjidhin gjithçka, nga transporti, e deri te ulja në bankat e shkollave.
Dhe teksa mbetet të vendoset nga Ministria e Arsimit në lidhje me mënyrën sesi do të zhvillohet mësimi vitin e ri akademik në mes të një pandemie, ne kemi shtruar disa nga çështjet më kryesore që kanë nevojë për zgjidhje sa më shpejt që të jetë e mundur!
Së pari, a do të bëhet mësimi në shkolla apo online?
Duke qenë se jemi në kulmin e pandemisë dhe numri i të infektuarve arriti dje pikun më të lartë që nga marsi, me 140 të infektuar në ditë, çështja e parë që kërkon vëmendje është se si do të zhvillohet mësimi. Pak ditë më parë, Ministria e Arsimit bëri me dije se po diskutohen disa alternativa, por deri më tani një gjë është e sigurt: nxënësit dhe studentët nuk do të kthen 100% në bankat e shkollave.
Shembujt që na vijnë nga vendet e tjera, nuk e rekomandojnë hapjen e shkollave. Izraelit, një nga vendet e para që rihapi shkollat në momentet kur ishte i bindur se e kishte mposhtur koronavirusin, iu rikthyen infeksionet si një bomerang. Brenda disa ditësh në Jeruzalem, infeksionet u përhapën si kërpudhat pas shiut. Virusi u përhap në shtëpitë e studentëve dhe më pas në shkolla dhe lagje të tjera, duke infektuar përfundimisht qindra studentë, mësues dhe të afërm. Kjo detyroi qindra shkolla të mbyllen, dhjetëra mijëra studentë dhe mësues të karantinohen.
A kanë gjasa fëmijët të infektohen nga COVID-19 ose të infektojnë të tjerët?
Është krijuar ideja sikur fëmijët janë imunë ndaj COVID-19, dhe në fakt, sipas Qendrave të SHBA për Kontrollin dhe Parandalimin e Sëmundjeve (CDC), fëmijët kanë më pak të ngjarë se të rriturit të infektohen.
Por kjo nuk do të thotë se shkalla më e ulët e infeksionit në mesin e fëmijëve nuk do të ketë pasoja negative. Shumë prindër kanë frikë t’i kthejnë fëmijët e tyre në shkollë, duke qenë se jetojnë me anëtarë të tjerë të moshuar të familjes. Le të mos harrojmë gjithashtu pjesën e madhe të mësuesve dhe stafit të shkollës që janë në rrezik të madh nga virusi.
A ka kapacitete për të testuar falas nxënësit nëse mësimi bëhet në shkollë?
Testimi rutinë duhet të kthehet në një domosdoshmëri nëse nxënësit rikthehen në shkollë. Një shkollë në Gjermani u ofron teste falas studentëve dhe mësuesve dy herë në javë që ata t’i realizojnë vetë në shtëpi. Edhe Luksemburgu testoi rreth 6 mijë nxënës të shkollave të mesme dhe dy mijë mësues para se klasa të fillonte në maj.
Në Angli, shkencëtarët kanë bërë thirrje për testime rutinë të mësuesve dhe nxënësve së bashku me një sistem të fortë të gjurmimit të rasteve, në një kohë që vendi është në mes të një debati se si të rihapin me siguri shkollat. Deri më tani po diskutohet nëse duhet që mësuesit dhe nxënësit të bëjnë teste javore, apo të testohen ata që janë simptomatikë! Nëse mësimi do të nisë në shkolla, atëherë kontrolli paraprak apo testimi rutinë do të jetë i nevojshëm kur shumica e fëmijëve të kthehen në bankat e tyre.
A duhet të paguajmë tarifat e plota të shkollës nëse mësimi bëhet online?
98 % e pjesëmarrësve në sondazhin që realizuam javën e kaluar, mendonin se tarifa duhet të ulet nëse mësimi do të zhvillohet online këtë vit të ri akademik dhe vetëm 2% mendonin se nuk duhet të ulet. Arsyet që numëronin për uljen e tarifave ishin nga më të ndryshmet (lexo këtu), por më kryesor ishte fakti që njohuritë e marra në shkollë/universitet nuk janë të njëjta me ato marra para një kompjuteri.
Shumë shpreheshin se kishin vështirësi financiare në këtë periudhë pandemie, që i ka gjetur prindërit e tyre pa punë. Një arsye jo pak e rëndësishme ishte fakti që duke qenë se nxënësit mësojnë nga shtëpia, atëherë nuk kanë përse të paguajnë për transportin, ushqimin në shkolla, dritat, internetin apo shpenzime të tjera të shkollave private, në një kohë që qëndrojnë në shtëpi.
A po i ulin tarifat shkollat në shtetet e tjera në periudhë pandemie?
Mësimi online është një fenomen mbarëbotëror në këtë periudhë pandemie, dhe ka mjaft universitete apo kolegje në SHBA (Massachusetts Board of Trustees, Bergen Community College etj) që e kanë marrë në konsideratë uljen e tarifave ose ngrirjen e pagesave të shkollës në prag afati.
Në vend të kërkimit të një pagese të plotë, bordet ekzekutive të shkollave po mendojnë sesi ta bëjnë të aksesueshëm mësimin online tek të gjithë, pasi ky është vërtet një shqetësim i madh.
Po unë që nuk kam internet si do të mësoj online?
Shqetësimi kryesor është sesi do të bëhet mësimi i aksesueshëm për të gjithë nxënësit, pasi jo të gjitha familjet kanë akses në internet. Sipas ministres Besa Shahini, po përgatitet një platformë e re online që do lehtësojë krijimin e klasave virtuale.
“Kanali RTSH shkolla do të vazhdojë të punojë edhe gjatë verës, që në shtator të jetë tërësisht gati”, tha Shahini pak ditë më parë.
Dhënia e librave falas thuhet se do të vazhdojë këtë vit duke përfshirë edhe nxënësit e klasave të gjashta dhe të shtata, kurse vitin tjetër mësimor 2021-2022 synimi është të ofrohen falas edhe librat e klasës së tetë dhe të nëntë, pra të të gjithë ciklit të arsimit të detyrueshëm.
Gjatë pandemisë së koronavirusit, të paktën një miliard nxënës në mbarë botën kanë mbetur larg arsimit. Sekretari i përgjithshëm i OKB-së, Antonio Guterres, në një video-mesazh të publikuar theksoi se në mbarë botën janë privuar nga arsimi parashkollor mbi 40 milionë fëmijë.
/Iconstyle.al
