Nëse në ato pak orë që të lejohet të dalësh nga shtëpia ke hasur më shumë ngacmime me natyrë seksuale sesa në një vit të tërë, nuk je vetëm!
Një nga efektet e papritura të pandemisë së COVID-19 duket se është pikërisht shtimi i ngacmimeve seksuale në rrugë dhe shkak duket se është frustrimi i tepërt seksual që meshkujt po përjetojnë këto kohë.
Si pasojë e rregullave për distancmin social, shumë prej tyre janë privuar nga intimiteti, çka qartazi po përkthehet në një shtim të dukshëm të ngacmimeve në rrugë.
Por nëse deri para pak kohësh ngacmime të tilla konsideroheshin më së shumti të bezdisshme, ofenduese dhe shqetësuese, në një moment të tillë bëhen shumë herë më të frikshme.
Me rrugët ende relativisht të boshatisura e nuk ka as dëshmitarë e as njerëz që mund të të ndihmojnë për shkak të izolimit, gratë dhe vajzat janë edhe më vulnerabël ndaj ngacmimeve që nga tentativa të dështuara flirtimi, mund fare mirë të shndërrohen në abuzime seksuale.
Ndaj krahas frikës së infektimit nga koronavirusi, tashmë gratë dhe vajzat duhet gjithashtu të frikësohen nga meshkujt që shfrytëzojnë mundësitë e pakëta të daljes për të shfryrë në rrugë gjithë frustrimin e tyre seksual.
Rasti më shqetësues ishte ai i pak ditëve më parë në zonën e “Ali Demit”, ku dy vajza u sulmuan në mënyrë të dhunshme në rrugë pasi refuzuan të hipnin në makinën e dikujt që po i ngacmonte, i cili më tej rezultoi të ishte një ish i burgosur për vrasje (lexo këtu).
Por teksa në Shqipëri kjo as nuk është shndërruar ende në diskutim dhe gati-gati konsiderohet diçka normale, në vende të tjera nuk shihet kështu.
Në Francë, prej vitit 2018, ngacmimet në rrugë dënohen me gjobë dhe jo pak, por 750 euro.
Vetëm në vitin e parë të miratimit të ligjit të ri, më shumë se 700 persona janë gjobitur për ngacmime në rrugë.
Megjithatë, në vendin tonë duket ende e largët dita kur do të nisë ndërgjegjësimi mbi efektet e ngacmimeve në rrugë ndaj grave dhe vajzave që në kushtet ku ndodhemi sot, janë edhe më shqetësuese.
