Arqipeshkvi Imzot George Frendo dha një mesazh prekës nga Katedralja e Shën Palit në Tiranë e cila për herë të parë ishte bosh, pa besimtarët katolikë për shkak të situatës nga pandemia.
Imzot George Frendo tha se kjo është nata që ka fuqinë të shndërrojë errësirën në dritë, ndërsa kujtoi kremtimin e Pashkëve në ’97-n kur besimtarët qanin teksa luteshin.
Ai foli për largimin e shumë shqiptarëve nga Shqipëria, të cilët njihen si guximtarë, por u bëri jehonë heronjve, atyre shqiptarëve që qëndrojnë në tokën e tyre, dhe bëhen heronj.
“Ndërsa zakonisht ju takoj në këtë kishë katedrale sonte nëpërmjet televizorit. Cdo vit kremtojmë festën e Pashkëve, por në një situatë të ndryshme. Më kujtohet kur kam kremtuar pashkët për herë të parë në Shqipëri, marsi i 1997, gjatë kremtimit kam parë disa besimtarë duke qarë, por unë kujtova fjalët e Jezusit, që ai tha pak orë para se ushtarët ta kapnin për ta çuar drejt kryqit u tha apostujve, ju do të hidhëroheni, por hidhërimi juaj do të kthehet në gëzim.
Kur gruaja është duke lindur hidhërohet, se i erdhi ora e lindjeve, por kur lind foshnja ajo e harron vuajtjen nga gëzimi se ka sjellë një njeri në botë. Sot po bëjmë shumë sakrifica por le të hedhim me shpresë një shikim drejt një të ardhmeje që do të kurorëzojë të gjitha sakrificat që po bëjmë këto ditë. Kjo është nata që ka fuqinë të shndërrojë errësirën në dritë. Kjo natë na mëson domethënien e sakrificave me agjërimet apo të tjerave, që kemi hequr dorë nga gjëra që na pëlqejnë. Kjo natë na shndërruar dëshpërimin në shpresë, vdekjen në jetë”.
“Kush ëndërron të largohet nga Shqipëria mendon se është guximtar, por ai që vendos të qëndrojë duke ëndërruar një Shqipëri më të mirë është hero. Ndoshta shumë kënaqen të jenë guximtarë, por kërkoni më shumë të jeni heronj, Shqipëria ka nevojë për ju” tha ai.
