Gjykata e Krimeve të Rënda ka hedhur poshtë kërkesën e avokatit të ish-ministrit Saimir Tahiri për lehtësimin e masës së sigurisë “Arrest Shtëpie”.
Dy prokurorët e çështjes Vladimir Mara dhe Besim Hajdarmataj thanë sot në seancën gjyqësore se masa “Arrest Shtëpie” është e domosdoshme pasi rrezikohet prishja e provave.
Por avokati Maks Haxhia tha se gjithçka është bërë për të denigruar figurën e ish-Ministrit të Brendshëm, pasi prokuroria nuk ka asnjë provë të re nga ato të disa muajve më parë ku kërkoi pezullimin e pasaportës të ish-Ministrit.
Në fjalën e tij, Saimir Tahiri, i cili erdhi në gjykatë i shoqëruar nga policia, ironizoi masën e dhënë:
“Ju keni thënë për mua ‘arrest shtëpiak’ po për mua është njësoj si ‘arrest shtëpiak’ e si ‘arrest me burg”, mësohet të ketë thënë ish-ministri i Brendshëm, sipas Top Channel.
Tahiri akuzohet për trafik droge në formën e grupit të strukturuar kriminal dhe korrupsion pasiv të funksionarëve të lartë shtetërorë, në kuadër të hetimeve për dosjen “Habilaj”.
