Autoritetet franceze kanë vendosur mijëra policë përpara “Champs-Elysées” në Paris, për të kontrolluar zemërimin e protestuesve të cilët kundërshtojnë rritjen e çmimit të naftës së vendosur nga qeveria e presidentit Emmanuel Macron.
Të ashtëquajturit protestues me “jelekë të verdhë”, e kanë kthyer në zonë lufte, zonën turistike të Parisit. Policia ka përdorur gaz lotësjellës për të shpërndarë turmën, në ditën e tretë të demostratave, teksa shumë prej tyre tentuan të konfrontohen me policinë. Sipas “France 24”, deri më tani janë arrestuar rreth 16 protestues.
Një ngë tetë delegatët e jelekëve të verdhë, Julian Terrier është shprehur në një intervistë për “Il Corriere della Sera”, se nuk do të ndalen derisa të plotësohen kërkesat e tyre.
“Objektivi i parë: masa për të rritur fuqinë blerëse dhe menjëherë, sepse shumë francezë nuk arrijnë në fund të muajit. Së dyti, zvogëlimi i hendekut midis qeverisë dhe qytetarëve. Duam kuvende dhe referendume në mënyrë që të gjithë të mund të shprehen”. – ka deklaruar Terrier.
Kjo është protesta e tretë e organizuar nga “jelekët e verdhë” në Paris.
