Sezoni i ri televiziv që nis këtë shtator, do të sjellë ndryshime të mëdha në ekran.
Jo vetëm programacioni do të vijë me ndryshime, por edhe moderatorët e emisioneve kanë ndërruar “shtëpi”, duke u shkëmbyer mes tyre, për të nisur eksperienca të reja në ekran.
Sipas “Newsbomb.al”, Ermal Mamaqi nuk do të jetë më pjesë e “Tv Klan” këtë sezon.
Mësohet se emisioni i tij i humorit, “Xing me Ermalin”, nuk do të transmetohet më dhe të shtunën do të jepet spektakli i humorit “Duplex”.
Ende nuk është bërë e ditur nëse Mamaqi do ta vazhdojë emisionin e tij në një tjetër ekran, apo do të shkëputet për një periudhë të pacaktuar kohore, duke qenë se po merret me xhirimet e filmit më të ri, “I love Tropoja”.
Ky largim i Mamaqit nga “Tv Klan” u përfol edhe më herët, megjithatë aktori nuk konfirmoi asnjë lajm në lidhje me lëvizjen e tij.
Ai ende nuk ka reaguar pas këtyre lajmeve dhe mbetet të presim për të mësuar ç’do të bëhet me “Xing me Ermalin” dhe nëse aktorin do ta shohim këtë sezon në ndonjë tjetër televizion.
