Një ditë pas sulmit me armë në banesën e familjes së gazetares së “News 24”, Klodiana Lala, është zbardhur dinamika e ngjarjes.
Në momentin e sulmit në shtëpi kanë qenë prindërit, vëllai, motra, dy vajzat e saj të mitura, si dhe disa të afërm të gazetares. Vetë Klodiana nuk ndodhej aty në momentin e sulmit.
Njerëzit që ndodheshin në banesë janë zgjuar të terrorizuar sapo kanë dëgjuar të shtënat, për të cilat fillimisht kanë menduar se ishin fishekzjarrë, pasi në lagjen e tyre kishte pasur një dasmë.
Madje, edhe pse autori vazhdonte të qëllonte, ata kanë nxituar të dalin jashtë për të parë se çfarë po ndodhte, duke rrezikuar seriozisht jetën, raporton “Panorama”.
Sipas policisë, dy plumba kishin depërtuar në një dhomë gjumi që ndodhej përballë derës, ku shenjat e plumbave janë të dukshme në xhama dhe në mure.
Për ngjarjen është ngritur grupi hetimor, nën drejtimin e prokurorit, ndërsa janë angazhuar ekspertët dhe oficerët më të mirë për zbardhjen e saj. Megjithatë deri tani ende nuk ka persona të shoqëruar apo të dyshuar konkretë në lidhje me sulmin për shkak të detyrës së Klodiana Lalës.
