Aktivistja e njohur e të drejtave të komunitetit LGBT, Xheni Karaj ishte sot e ftuar në emisionin e Rudina Magjistarit, ku foli për jetën e saj dhe sesi doli hapur për të krijuar më pas aleancën.
Xheni tregoi se kur ishte në të ’20-tat ajo mendonte se ishte e vetmja lesbike në Shqipëri, pasi në atë kohë ishte tabu të flisje për homoseksualitetin dhe njerëzit nuk flisnin për preferencat e tyre seksuale.
“Mendoja se isha e vetmja lesbike në Shqipëri! Të rritesh me idenë se je i vetmi person, ajo ndjesia e izolimit, ajo ndjesia e vetmisë nuk është ndonjë gjë shumë e lehtë për t’u përtypur. Nuk mund të flisja me askënd sepse frika më e madhe ishte që do të humbas dashurinë e shoqërisë, dashurinë e familjes nëse e marrin vesh që kam këtë orientim seksual”, u shpreh Xheni.
Ajo tha se të gjithë njerëzit e komunitetit LGBT duhet të jenë krenarë, ndërsa kujtoi edhe momentin kur doli hapur në publik në emisionin “Opinion” te “Klan-i”.
“Ka qenë i pamenduar. Ishte një debat për paradën që do të bënim në 2018-n. Para se të shkoja në emision mami më tha mos fol. I thashë që nuk do flas por do të mbështes Kristin në publik. I bëra premtim familjes që do merresha me aktivizëm por nuk do të deklarohesha. Kur filloi debai pati dhe kërcënime ndaj Kristit, thashë: ‘Xhen po nuk fole tani do të qëndrosh gjithnjë me kokën ulur’. Të nesërmen kisha njerëz që ma bënin me gisht dhe thoshin: Lesbikja që foli te Klan-i”.
Xheni foli edhe për momentin kur e mësuan prindërit që ishte lesbike, dhe kjo ndodhi pas një interviste që ajo kishte dhënë për një televizion. Edhe pse fytyrën e kishte të mbuluar, zëri dallohej qartë që ishte i saj, ndaj dhe prindërit e kuptuan menjëherë.
/Iconstyle.al
