Meghan Markle ka vlerësuar votimin e fundit të Irlandës për të legalizuar abortin, në disa biseda private të bëra me aktiviste dhe politikane, gjatë një vizite në Dublin këtë javë.
Kjo quhet një shkelje e rëndë e protokollit mbretëror, pasi anëtarët e familjes mbretërore e kanë të ndaluar të shprehin opinionin e tyre mbi çështje politike.
Catherine Noone, një ligjvënëse irlandeze që mbështeti fushatën për të shfuqizuar ndalimin e aborteve, shkroi në Twitter për bisedën me Dukeshën e Sussex pas takimit me të:
“Dukesha dhe unë patëm një bisedë për rezultatin e fundit të referendumit – ajo e shikonte me interes dhe pati kënaqësinë të shihte rezultatin”, tha Noone, sipas The Daily Beast.
Pak muaj më parë, aktorja e “Suits” shprehu mbështetje të fuqishme për lëvizjet “Me Too” dhe “Time’s Up” në një event mbretëror së bashku me princin Harry, me të cilin ajo u martua në maj.
Ekspertët i quajtën ato komente një shkelje e paprecedent që mund të sinjalizonte një pikë kthese për familjen mbretërore.
