Princ Harry dhe Meghan Markle do të kenë grupin më të bukur të shoqëruesve në dasmën e tyre. Në fakt bëhet fjalë për 10 shoqërues, të cilët do të jenë vetëm fëmijë.
Ndërkohë që në mediat botërore po qarkullon lajmi se Meghan Markle nuk do të shoqërohet nga babi i saj në altar, Pallati Mbretëror njoftoi mëngjesin e së mërkurës se çifti do të shoqërohet në ditën e tyre të madhe nga 10 fëmijë.
Vetëm tre ditë na ndajnë nga dita e madhe dhe përgatitjet e dasmës tashmë janë bërë më intensive, duke u kujdesur edhe për detajet më të vogla, që nga lulet, torta etj.
Dy shoqëruesit kryesor të princ Harry dhe Meghan Markle do të jenë princeshë Charlotte dhe princi George, të cilët do të kenë të njëjtin rol, siç kishin muajin e kaluar në dasmën e tezes së tyre Pippa Middelton.
Disa nga shoqëruesit e tjerë të çiftit do të jenë fëmijët e miqve të tyre më të mirë.
Së bashku me princ George dhe princeshë Charlotte do të jetë edhe Grace van Cutsem, e bija e Alice dhe Nicholas van Custem. Ajo ka qenë edhe në dasmën e Kate dhe William dhe është bërë personazh për fytyrën e ngrysur që ka bërë gjatë ceremonisë së martesës.
Remi Lit, 6 vjeçe dhe motra e saj, Rylan 7 vjeçe, vajzat e Benita Litt, kuratores dhe dizenjueses së çantave, do të jenë gjithashtu shoqëruese të çiftit si mikesha të Meghan.
Ivy Mulroney vajza 4-vjeçare e Jessica Mulroney, stilistes dhe mikeshës së Meghan do të jetë shoqëruesja e Meghan dhe Princ Harry së bashku me dy vëllezërit e saj binjakë, Brian dhe John Mulroney.
Pjesë e ekipit shoqërues të çiftit do të jetë edhe Zaile, vajza e Zoe Warren dhe Jake Warren, e cila e ka kumbarë princin Harry.
Gjithashtu në listën e shoqëruesve do të jetë edhe Jasper Dyer, 6 vjeç, djali i mikut të vjetër të Harry, Mark Dyer.
Ndërsa përsa iu përket veshjeve të tyre, Pallati Mbretëror ka thënë se do të zbulohen vetëm ditën e dasmës.
Burimi: People
