Ditën e djeshme, një efektive e OFL-së (Operacioni Forca e Ligjit), që doli në një konferencë për shtyp, tërhoqi vëmendjen e të gjithëve me look-un e saj!
Krahas uniformës së policisë, ato që ranë në sy ishin kapelja dhe syzet e diellit që kishte vendosur efektivja në detyrë, të cilat u komentuan gjerësisht në media dhe rrjetet sociale!
Efektivja arriti të kthehej edhe në meme-n e ditës pikërisht falë këtij “maskimi”, i cili u duk fillimisht si një mungesë etike për faktin se vajza dukej e identifikueshme me flokët e saj bjondë të gjatë që binin në sy.
Ky maskim u duk i çuditshëm, duke i dhënë efektives një look jo edhe aq profesional, por sikur të mos mjaftonte ky gabim, sot disa media kanë shkuar edhe më tej, duke zbuluar identitetin e saj me emër, mbiemër dhe foto personale dhe duke e rritur kështu peshën e fajit!
Me sa duket u harrua arsyeja se përse efektivja doli me syze dhe kapele në një konferencë për shtyp! Dje deputeti i Partisë Socialiste, Alket Hyseni, tregoi në emisionin “Repolitix” se mbajtja e syzeve dhe kapelës është për shkak të sigurisë së tyre, pasi çështjet me të cilat ato merren, kanë një risk të madh.
“E kam kënaqësi ta shoh imazhin e ri. Tani ky është imazhi i ri i Policisë së Shtetit, nga një polici me bark të madh që pinte birra. Sot janë 5500 policë që kanë dalë nga Universiteti. Ka qëllim të fshehë sytë për të mos u shfaqur publikisht sepse riskojnë. Ne u përpoqëm me vështirësi të mëdha të sjellim një akt për të mirën e sigurisë publike dhe për të mirën e imazhit të këtij vendi. Mesazhi politik që përcjellim është ky: Do ia nxijmë jetë çdo ditë e më tepër krimit. Na prini dhe na ndihmoni në këtë rrugë. Mos u bëni pengesë”, tha Hyseni.
E dimë që të gjithë kanë qenë kuriozë për të zbuluar se kush është “biondja misterioze”, por të ekspozosh identitetin e një efektiveje që merret ose flet për çështje kriminale të një rrezikshmërie të lartë, do të thotë ta vësh në rrezik atë!
Ajo dje përmendi dy emra të njohur për drejtësinë, të përfshirë në disa ngjarje kriminale. Përmes një konference për shtyp, OFL i kërkoi Lulëzim Berishës dhe Adrian Çapjas se duhet të justifikojnë pasurinë e tyre brenda dy ditëve, ose do t’iu sekuestrohet.
