“Facebook” dhe “YouTube” po bllokojnë mediat shtetërore ruse që të shfaqin reklama në platformat e tyre, ndërsa “Twitter” po pezullon të gjitha reklamat në Ukrainë dhe Rusi, pasi presioni rritet mbi platformat e teknologjisë për t’iu përgjigjur pushtimit rus të Ukrainës.
Nathaniel Gleicher, kreu i politikës së sigurisë në “Facebook”, shkroi të premten në Twitter: “Tani po i ndalojmë mediat shtetërore ruse të shfaqin reklama ose të fitojnë para në platformën tonë kudo në botë”.
Të shtunën, “YouTube” në pronësi të “Google” tha se po pezullonte gjithashtu disa kanale të medias shtetërore ruse, nga fitimi i parave nga reklamat. Përveç kësaj, platforma e videove në internet po kufizon rekomandimet për ato kanale dhe po i bllokon ato tërësisht në Ukrainë me kërkesë të qeverisë ukrainase, sipas një zëdhënësi të “YouTube”.
“Twitter”, i cili ndaloi reklamat nga mediat e kontrolluara nga shteti në vitin 2019, gjithashtu ndërmori veprime, duke thënë të premten se po ndalonte përkohësisht të gjitha reklamat në Ukrainë dhe Rusi “për të siguruar që informacioni kritik i sigurisë publike të ngrihet dhe reklamat të mos e dëmtojnë atë”.
Pezullimet e reklamave vijnë pasi kompanitë e teknologjisë amerikane po shtrëngohen nga përpjekjet e vazhdueshme të Kremlinit për të forcuar kontrollin e tij në komunikim dhe për të mbytur mospajtimin.
