Teksa bota shpreson te mbrojtja përmes vaksinave, gazetat gjermane Bild dhe Handelschblatt deklaruan se vaksina Oxford/AstraZeneca është vetëm 8% efektive te njerëzit mbi moshën 65-vjeçare, duke cituar sipas tyre, burime të larta qeveritare.
Më tej shkrimi vazhdon se zyrtarët gjermanë kanë frikë se vaksina e ndërmarrjes farmaceutike britanike nuk do të miratohet nga organi rregullator evropian për njerëzit mbi moshën 65 vjeç. Shifra shokuese, vetëm 8% solli reagim të menjëhershëm të shkencëtarëve, të cilët kanë kritikuar pretendimin “plotësisht të pasaktë”. Universiteti i Oksfordit e ka hedhur poshtë raportin, duke thënë se nuk kishte asnjë bazë për pretendimin dhe se të dhënat e tyre tashmë janë lëshuar në mënyrë transparente. Si për të zhdukur cdo hije dyshimi dhe frike, shkencëtarët shtuan se ata as nuk ia kishin idenë se nga ka ardhur shifra.
Një deklaratë e tillë vjen në mes të një mosmarrëveshjeje të ashpër midis Bashkimit Evropian dhe AstraZeneca-s rreth dërgesave, me kompaninë që thotë se nuk do të jetë në gjendje të përmbushë një porosi të mëparshme. AstraZeneca i ka pakësuar dukshëm furnizimet me vaksinën kundër koronavirusit në BE dhe arsyeja ka të bëjë me problemet në prodhim.
Edhe nga furnizuesi tjetër i vaksinës ndaj koronavirusit ka vonesa, ku në disa vende të BE-së po shtohet pakënaqësia ndaj Pfizer-it.
