E huaja “The Independent” ka përhapur sot alarm me anë të një artikulli, kushtuar gjuetisë së kafshëve të egra në Shqipëri, pas publikimit të një fotoje të një restoranti në Drilon që ofron gatime me mish ariu.
Media britanike shkruantw se tregtia e jashtëligjshme të jetës së egër në Shqipëri kishte dalë “jashtë kontrollit”.
“Studiuesit thanë që ishte hera e parë që ata kishin parë mish ariu të gatuar në Evropë, dhe ekspertët paralajmëruan se mishi i papërpunuar i kafshëve mund të çojë në shpërthim të sëmundjeve siç është koronavirusi. Arinjtë, majmunët dhe zogjtë grabitqarë janë ndër kafshët e gjalla që shiten në vendet e njohura të tregut online në internet, duke rritur frikën për mbijetesën e disa specieve në vend”, shkruante mes të tjerash artikulli. (Lexo këtu)
Ekspertët paralajmëruan se konsumimi i këtij mishi mund të sjellë sëmundje të shkaktuara nga parazitët, me simptoma si diarre, ngërçe, ethe dhe halucinacione.
Pas alarmit të ngritur, për “Report TV” ka reaguar pronari i restorantit në Drilon, Pandi Çekiçi.
Ai e ka mohuar lajmin e mediave britanike, duke deklaruar se në restorantin e tij nuk ofron mish ariu.
“Jam njohur me lajmin. Nuk është e vërtetë, kur të doni, si të doni, paraqituni në lokal, kontrollojeni lokaloin dhe shikojeni. Ajo nuk është menuja ime, mish ariu jo, nuk flitet, nuk bën vaki. Kafshë të egra jo, nuk kam fare, ka 10 vjet, që ka qenë e imja, vetëm rosë e egër, lepuri i egër, kanë qenë para 10 viteve, është bllokuar, nuk kam shitur asnjë gram që kur doli kjo e bllokimit të kafshëve të egra. Mish ariu jo, nuk bën vaki, absolutisht, e jap me përgjegjësi të madhe këtë“- u shpreh ai.
