Një studente 20-vjeçare në kolegj nga Florida është akuzuar për vrasjen e fëmijës së saj të porsalindur, të cilin autoritetet thonë se e lindi në një tualet, e pa teksa qante dhe mbytej, dhe më pas e varrosi në oborrin e saj.
Sipas NBC News , Anne Demeghillo dyshohet se lindi në orët e para të 5 marsit brenda tualetit të shtëpisë së saj në Palm Coast. Autoritetet thonë se ajo e pa foshnjën, një vajzë të vogël, të qante dhe të mbytej përpara se të dilte nga shtëpia për të ndjekur mësimet dhe një shfaqje universitare. Më vonë ajo u kthye dhe e varrosi të porsalindurin në oborrin e saj, thanë autoritetet në një deklaratë.
Të hënën, një juri e madhe e paditi atë për vrasje të shkallës së parë, abuzim të rënduar me fëmijë dhe mosraportim të një vdekjeje me qëllim fshehjen e provave, sipas dokumenteve të gjykatës dhe të dhënave të burgut. E pandehura mbetet në paraburgim pa lirim me kusht.
Demeguillo u arrestua më 6 mars dhe fillimisht u akuzua për vrasje të rëndë të një të mituri. Ajo u lirua me kusht rreth një javë më vonë, pasi prindërit e saj vunë shtëpinë që ndanin si garanci, sipas të dhënave të gjykatës. Sipas një deklarate, policia thotë se 20-vjeçarja i dërgoi një mesazh një shoqeje për atë që dyshohet se kishte bërë, duke e bërë shoqen të telefononte autoritetet.
Sipas dokumentit përkatës, Demegillo u tha oficerëve se e nxori foshnjën nga vaska pasi ajo ndaloi së lëvizuri, e mbështolli me një batanije, e vendosi në një çantë udhëtimi dhe e fshehu çantën në dollapin e dhomës së saj të gjumit. Më pas ajo shkoi në universitet për të marrë pjesë në një shfaqje teatrale dhe u kthye më vonë për të varrosur vajzën e vogël në një varr të cekët në oborr.
“Ajo deklaroi se e pa foshnjën të lëvizte në vaskë me kokën pjesërisht të zhytur në ujë, e dëgjoi të qante dhe priti derisa ajo ndaloi së lëvizuri dhe të qari”, thuhet në deklaratën e policisë.
Në një deklaratë, Zyra e Sherifit të Qarkut Flagler tha se fotot e Casey Anthony u gjetën në telefonin e saj celular dhe se ishin kryer kërkime në internet për “foshnje të parakohshme” dhe “ushqime që ulin pjellorinë”.
Rasti i Casey Anthony tronditi Shtetet e Bashkuara në vitin 2008, kur fëmija i saj u zhduk në Florida dhe ajo njoftoi autoritetet 31 ditë më vonë, duke çuar në një kërkim të gjerë dhe zbulimin e trupit të fëmijës në një zonë aty pranë.
Akuzat për vrasje, abuzim të rënduar me fëmijë dhe vrasje të rënduar me pakujdesi nuk u provuan në gjykatë gjatë një gjyqi shumë të publikuar që tërhoqi vëmendje të madhe publike. Anthony kaloi rreth tre vjet në burg duke pritur gjyqin dhe përfundimisht u dënua për një kundërvajtje, pasi u shpall fajtore për dhënien e deklaratave të rreme në polici.
Në një deklaratë të hënën, Sherifi i Qarkut Flagler, Rick Staley, e quajti rastin e Demeghillo-s tronditës.
“Ky është një nga ato raste tragjike që të trondit thellësisht, ku një nënë lejon që një i porsalindur të vdesë sepse e sheh atë si një pengesë në jetën e saj”, tha ai. “Është e vështirë të kuptohet se si një nënë do të zgjidhte ta shihte foshnjën e saj duke u mbytur në vend që ta merrte nga lavamani.”
Demeghillo është planifikuar të dalë në gjyq më 21 prill.
