16-vjeçari me inicialet D.K., nga Berati që akuzohet se kërcënoi Adela Cacin, se do t’i publikonte video, ka dalë para gjykatës ku është njohur me vendimin me burg.
Vajza, e cila i dha fund jetës duke u vetëhelmuar me pesticide, kishte pasur lidhje prej 2 vitesh me djalin.
Ky i fundit e kishte kërcënuar vajzën se do t’i publikonte videot e saj private dhe i kërkonte asaj para.
“Shit varësen, byzylykun e më sill lekët ose ua tregova videot”, ishin disa nga mesazhet që ai kërcënonte vajzën.
Seanca për masën e sigurisë u zhvillua në Vlorë me dyer të mbyllura, pasi në këtë qytet është njëra nga pesë qendrat e paraburgimit për të miturit.
Adoleshentja ishte banuese në fshatin Duhanas, ndërsa shkollën e bënte në gjimnazin profesional në qytetin e Beratit, ku ishte nxënëse në vitin e parë. Në të njëjtin gjimnaz është nxënës edhe përndjekësi i saj, D.K., tashmë i arrestuar.
Prindërit nuk kishin kuptuar asgjë nga tronditja që po kalonte vajza e tyre dhe as shoqet e shokët e klasës, edhe pse një ditë para aktit ekstrem ajo u kishte treguar se ndihej e shqetësuar nga shoku i shkollës.
Gjithçka u kuptua nga telefoni i vajzës pasi ajo ndërroi jetë. Aty kishte mesazhe të shumta nga 16-vjeçari, i cili u arrestua menjëherë nga policia.
