Kryeministri Edi Rama ka treguar sot se do të ketë disa lehtësime në periudhën kohore që është vendosur për të bërë pazar.
Nga 60 minuta që është aktualisht, me masat e reja të ndërmarra nga qeveria do të kemi 90 minuta afat për të bërë pazaret e nevojshme, gjithnjë duke marrë leje në e-albania.
Gjithashtu kreu i qeverisë bëri me dije se marrja në automjetin e punës së një familjari, apo një pensionisti do të ndëshkohet me disa vite të heqjes së lejes së qarkullimit dhe sekuestrimit të makinës, deri në heqje lirie.
Fjala e kryeministrit Rama:
“Marrjen e familjarëve në automjete apo edhe personave të tjerë do të ndëshkohet me disa vite të heqjes së patentës apo me sekuestrim të po aq viteve të makinës dhe heqje lirie. Marrja në makinë e një pensionisti do ndëshkohet gjithashtu me disa vite të heqjes së lejes së qarkullimit dhe sekuestrimit të makinës deri në heqje lirie.
Do hapim orarin e lëvizjes për të bërë pazar, do ta bëjmë 90 minuta dhe kryerja me automjete private e pazarit do të jetë e mundur, por me ndëshkime të mëdha. Hapja e aktivitetit të ndaluar do dënohet me burg, heqje patente, sekuestrim të makinës dhe sekuestrimin e gjithçkaje që ka aty brenda.
Po ashtu jemi duke studiuar hapjen e orarit, shtrirjen e fashës orare. Fasha orare është e diskutueshme dhe i qëndroj bindjes që nuk është problem fasha e orarit. Por të gjitha këto do të jenë masa që janë gati por do të jenë të përshkallëzuara me pikatore. Jemi në momentin që po ngjisim majën e kodrës dhe do të na thonë ekspertët se çfarë dhe si do të bëjmë”, tha Rama.
