Prej dy ditësh në media ka bërë bujë sherri mes dy aktorëve të njohur të humorit, Gentian Hazizi dhe Ledio Lako.
Aktorët janë konfliktuar me njëri-tjetrin në zonën e “Ish-Ekspozitës” dhe nuk kanë munguar as grushtet mes tyre.
Sipas njoftimit të Policisë së Tiranës, ka qenë Ledio Lako ai që ka qëlluar me një përforcues grushti metalik aktorin Gent Hazizi dhe një person tjetër që ka qenë në shoqërinë e këtij të fundit pranë një karburanti.
Pas lajmeve të shumta që qarkulluan në rrjet, Lako ka dhënë versionin e tij të historisë për “Panorama.com”.
Ai është shprehur se s’kishte asgjë më shumë se një sherr banal.
“Sherr artistësh, për çfarë do zihemi tjetër për drogë?! Jemi zënë për tekstin. Genti mund të jetë i axhituar, por këto doreza janë kot. U zumë kot, pas teatrit për punë roli. Jo roli jot, jo ma thuaj batutën, jo s’ma thua batutën. S’ka qenë ndonjë konflikt për t’u raportuar, por me që po kalonte policia aty. Me shpulla jemi goditur. Nuk të nxjerr njeri nga rajoni po të gjuash me dorezë, mjet metalik të fortë.”- është shprehur aktori.
Ndërkohë, aktori Gentian Hazizi ende nuk ka dhënë versionin e tij të sherrit të shumëpërfolur.
