Nëse mendoni se keni pasur një vit të vështirë, hidhini një sy jetës së këngëtares Ariana Grande: sulm terrorist në koncert, ish-i dashuri humb jetën nga mbidoza dhe fejesa me Pete Davidson merr fund në sy të gjithë botës. Por si i hodhi pas krahëve të gjithë këto fatkeqësi këngëtarja e hitit “Breathin” dhe u ngrit sërish në këmbë?
Së fundmi, Ariana Grande ka zbuluar se ia ka dalë të ecë përpara falë terapisë. Pasi publikoi këngën “Thank You, Next”, një nga fansat nisi të bënte shaka se vetëm falë terapisë, Ariana ka arritur të shohë të mirat e ish-ave. Dhe këngëtarja vendosi t’i përgjigjet, duke konfirmuar se terapia i shpëtoi jetën.
“Kjo është shumë për të qeshur, por sinqerisht terapia më ka shpëtuar jetën disa herë. Nëse keni frikë të kërkoni ndihmë, bëhuni të guximshëm. Nuk duhet të jesh gjithë kohës në dhimbje e më pas të përjetosh traumë. Unë kam ende shumë punë për të bërë që t’ia dal, por gjithsesi kam hedhur hapat e para ” – shkruan këngëtarja.
Nuk është hera e parë që Ariana Grande flet hapur për problemet e shëndetit mendor. Pas sulmit terrorist në koncertin në Manchester në 2017, Grande u shpreh për gjithë ankthin dhe stresin që përjetonte.
