Miss Meksika 2025, Fátima Bosch, ka reaguar publikisht pas një debati të tensionuar me një drejtues të Miss Universe, i cili në një video të transmetuar live u pa duke e ofenduar dhe duke e quajtur “dumb” (budallaqe). Ngjarja ndodhi gjatë një aktiviteti para-finale në Tajlandë, ku do të mbahet edhe finalja e Miss Universe më 21 nëntor.
Sipas raportimeve, drejtuesi i konkursit Nawat Itsaragrisil i kërkoi Miss Meksikës të merrte pjesë në një fotosesion dhe të promovonte vendin mikpritës në rrjete sociale. Ai pretendoi se Bosch nuk po postonte me urdhër të drejtorit të Miss Meksikës.
Në videon e shpërndarë në rrjete, Bosch shihet duke u ngritur në këmbë për t’iu kundërpërgjigjur, duke mohuar akuzat. Por debati u tensionua më tej kur Itsaragrisil ndërhyri dhe kërkoi prej saj të deklaronte aty për aty se do të publikonte materiale promovuese për Tajlandën.
“Ti je në Tajlandë. Ji e kujdesshme, ti je në një lojë,” dëgjohet ai duke i thënë.
Bosch iu përgjigj:
“Sepse kam një zë. Ju nuk po më respektoni si grua.”
Ajo shtoi se ai e kishte quajtur “dumb” gjatë debatit, gjë që ajo e cilësoi si fyese dhe të padrejtë.
Pas incidentit, shumë nga konkurruese të Miss Universe u larguan nga salla në shenjë solidariteti me Miss Meksikën.
Drejtuesi i Miss Universe më pas kërkoi falje në një deklaratë video, duke thënë:
“Nëse dikush është ndier keq apo jo rehat, kërkoj falje për të gjithë.”
Ndërkohë, Presidenti dhe bashkëpronari i Miss Universe, Raul Rocha Cantu, shprehu hapur mbështetjen për Bosch, duke thënë se nuk mund të tolerohej mungesa e respektit ndaj grave.
Bosch, në një reagim të mëvonshëm, tha:
“Jam këtu për të qenë zëri i grave dhe vajzave që luftojnë për kauza. Nuk jam një kukull për t’u bërë gati dhe pozicionuar. Jam këtu me qëllim, me zë dhe nuk kam frikë ta përdor atë.”
Ngjarja shkaktoi diskutime të gjera online, ku shumë përdorues vlerësuan qasjen e saj të fortë dhe dinjitoze.
