Qeveria sudaneze ka njoftuar se do t’i japin fund martesës së fëmijëve dhe gjymtimeve të organit gjenital të femrave si një hap i madh përpara për të drejtat e grave dhe vajzave.
Autoriteteve u është kërkuar të informojnë komunitetet lokale se e ashtuquajtura FGM (Gjymtimi i organeve gjenitale) është i paligjshëm pas ligjeve të reja të miratuara në korrik. Nëse ky ligj thyhet, parashikohen dënime me deri në tre vjet burg.
“Oficerët e policisë do të kenë një përgjegjësi të madhe për të ndërhyrë dhe për të frenuar këtë krim kundër njerëzimit,” tha drejtori i përgjithshëm i policisë, Ezzeldin El Sheikh, duke shtuar se udhëheqësit fetarë në vendin kryesisht mysliman do të luanin një rol kryesor.
87% e grave sudaneze i janë nënshtruar gjymtimit të organit gjenital, që përfshin heqjen e pjesshme ose totale të organit gjenital të jashtme të grave për arsye jo-mjekësore. Grupmosha më e prekur është midis moshës 5 dhe 14 vjeç.
Këshilli i Ministrave gjithashtu njoftoi këtë javë se do të ndalojë martesat e fëmijëve dhe të miratojë të gjitha nenet e kartës afrikane mbi të drejtat dhe mirëqenien e fëmijës, e cila hyri në fuqi në 1999.
Sudani lejon martesat para moshës 18 vjeç, pavarësisht mbështetjes së rezolutave të këshillit të të drejtave të njeriut që nuk e lejon diçka të tillë. Rreth një e treta e vajzave në Sudan martohen para se të mbushin 18 vjeç.
Niki Kandirikirira, drejtoresha e programeve të “Equality Now” tha: “Tani pritet që qeveria të zbatojë ligjin përmes programeve që adresojnë normat shoqërore dhe duke e bërë të qartë ndëshkuese shkeljen e ligjit. Ata që shkelin ligjin do përballen me heqje lirie.”
Pas rrëzimit të Omar al-Bashir vitin e kaluar, qeveria e re ka filluar reformimin e vendit, duke u larguar nga pothuajse katër dekada të politikave të ashpëra islamike.
Qeveria i ka hapur rrugë ndryshimit të fesë, lejoi besimtarët e feve të tjera të pinë alkool dhe vendosi që gratë nuk do të kenë më nevojë për leje nga një anëtar mashkull i familjes së tyre për të udhëtuar me fëmijët e tyre.
Udhëheqësit botërorë janë zotuar të eleminojnë gjymtimet gjenitale dhe t’i japin fund martesës së fëmijëve plotësisht deri në vitin 2030.
