Me fillimin e sezonit të ri televiziv këtë shtator, priten ndryshime të mëdha në ekran.
Disa prej programeve të njohura do të mbyllen e të tjera do të na shoqërojnë në televizion gjatë këtij sezoni.
Përveç programacionit, ndryshime do të ketë edhe tek moderatorët.
Të shumtë janë ata që kanë njoftuar largimin e tyre dhe ditën e sotme, atyre i është bashkuar edhe moderatorja e emisionit “Next” në “Vizion Plus”.
Gjatë puntatës së fundit të emisionit, ajo ka njoftuar për largimin e saj dhe mezi ka mbajtur dot lotët, ndërsa videon e ka ndarë me ndjekësit në profilin e saj në Instagram.
“Nuk dua të shtoj asgjë tjetër, dukem se jam e mërzitur që po e lë. Do mbetet një eksperiencë shumë e vlefshme për mua!
Faleminderit edhe një herë të gjithë ata që punuan me mua këto dy sezone të “Next”
Faleminderit Fabian Basha për mundësinë dhe besimin që pate tek mua! Mirënjohje!!”- janë fjalët e moderatores krahas videos.
Mbetet të mësojmë se cili do të jetë projekti i ri televiziv që do të rikthejë në ekran Inger Skurën.
