Pavarësisht se sot është një ditë pushimi për administratën, studentët nuk ndalen. Me libra në duar, ata kanë nisur protestën edhe këtë të hënë, për të marshuar nga Korpusi Universitar drejt Ministrisë së Arsimit, duke kënduar himnin kombëtar.
Në ditën e 7-të të protestës, studentët u kanë bërë thirrje të gjithë të rinjve që rrijnë kafeneve, që t’u bashkohen. Studentëve të Universitetit të Tiranës u janë bashkuar dhe ata të Arteve.
Ndërkohë kryeministri Edi Rama ka ftuar në dialog studentët në orën 11:00, live në Facebook. Por me thirrjet “bashkohuni me ne, mos rrini në kafene”, ata shprehen se nuk do të ketë asnjë negociatë me kryeministrin që i ka ftuar në dialog.
“Jo negociata, vetëm plotësim të kushteve! Dhjetori i dytë vazhdon” thuhet në njoftimin e Bashkimit Kombëtar Studentor të shpërndarë të dielën.
Ndryshe nga ditët e tjera, veç pankartave studentët janë ftuar të marrin dhe nga një libër me vete.
8 kërkesat e studentëve:
1. Rritja e buxhetit në 5% e GDB me qëllim mundësimin e përgjysmimit të tarifës së studimit për çdo nivel studimi, përmirësim e mësimdhënies dhe infrastrukturës (universitete dhe konvikte).
2.Transparence me buxhetin nga ministria e Arsimit dhe IAL-ve, publikimi të gjitha shpenzimeve online
3.Rritja nga 10% në 50% e peshës totale të votës së studentëve për të zgjedhur kandidatët për dekanë, rektorë dhe cdo fakultet të ketë një përfaqësues të studentëve në senatin akademik.
4. Rishikimi i titujve akademikë dhe verifikimi i plagjiaturave të doktoraturave dhe teksteve mësimore.
5.Mbështetur në nenin 99 mbi Këshillat Studentore, ligji i arsimit të lartë, pika 2 kërkojmë që bordi i administrimit të IAL-eve të ketë numër të barabartë votash si nga MAS dhe IAL-t si edhe të shtohet një përfaqësues në këtë bord nga studentët.
6.Pajisja e të gjithë studentëve me kartën e studentit brenda vitit akademik 2018-19
7.Ndërtimi i bibliotekave me starndarde europiane dhe me libër universitar online, falas për studentët në gjuhën shqipe.
8.Vlerësimi i performancës në mësimdhënie dhe kërkim shkencor i pedagogut, publikimi i tij online dhe regjistrimi i leksioneve.
