Një nënë e re shqiptare ka treguar historinë e dhimbshme të jetës së saj.
E ftuar në emisionin “7 pa 5” në Vizion Plus, ajo tregoi sesi historia e dashurisë me një djalë që njohu në rrjetet sociale u shndërrua në një marrëdhënie torturuese, kur mbeti shtatzënë.
I riu i kërkoi të abortonte dhe ajo ra dakord, por kur shkuan për ta abortuar, djali nisi ta dhunonte vajzën dhe madje ta godiste me kaçavidë në bark, pasi nuk e donte fëmijën.
Ai e la vetëm më pas, ashtu të gjakosur dhe e reja i kërkoi ndihmë një shoqeje, e cila e mori në mbrojtje.
Sot vajza që nuk dëshiron të identifikohet, është bërë nënë dhe e ka fëmijën e saj rreth 7 muajsh, por e shqetëson fakti që nuk ka komunikim me prindërit e saj dhe as me ata të ish-partnerit.
“Ai e justifikoi dhunën duke thënë ‘ishte gabimi yt’. Duke qenë se e doja marrëzisht, ishte faji im”, u shpreh ajo.
Vajza tha se aktualisht babai i fëmijës së saj është jashtë shtetit dhe ka kontaktuar me të. Ai nuk e ka mohuar asnjëherë atësinë e fëmijës së tij.
“Një burrë nuk quhet burrë nëse vë dorë mbi një femër, dhe vajzat nuk duhet të tremben”, ishte ky mesazhi i nënës së re për të gjitha vajzat që mund të gjenden në pozitën e saj.
