Dita e sotme shënon ekzaktësisht një javë që nga konfirmimi zyrtar për dy rastet e para të prekura nga koronavirus në Shqipëri. Prej një jave, në vend ka nisur marrja e masave të ashpra për frenimin sa më shumë të jetë e mundur të përhapjes së virusit, por një mungesë e theksuar informimi lidhur me atë që po ndodh vërtet ka shqetësuar jo pak mediat e qytetarët.
Prej një jave, Ministria e Shëndetësisë në deklaratat e përditshme për shtyp jep informacione mbi rastet e reja të shfaqura, gjendjen e pacientëve të prekur me COVID-19 si dhe statistikat e azhornuara mbi testimet, por ndonëse pyetjet nuk kanë qenë të pakta, për një gjë askush nuk përgjigjet: Me çfarë po trajtohen të prekurit?
Lidhur me këtë çështje, pak ditë më parë ka folur shefja e Infektivit, Najada Çomo e cila u shpreh se pacientët në varësi të rasteve po trajtoheshin me antibiotikë e antiviralë, e megjithatë nuk u dha asnjë emër medikamenti.
Sakaq, në Itali, prej dy ditësh i është dhënë drita jeshille medikamentit të përdorur kundër reumatizmës dhe artritit të quajtur Tocilizumab (Actemra), i cili gjithashtu së fundmi është aprovuar dhe në Kinë për trajtimin efektiv të rasteve të prekur me COVID-19 që kanë paraqitur komplikacione të rënda. Ky medikament është porositur së fundmi dhe nga QSUT dhe ka qenë vetë dr. Pëllumb Pipero që e ka njoftuar një gjë të tillë për gazetën “Panorama”, një lajm ky mëse pozitiv për përjpekjet e mjekësisë shqiptare për t’i vënë fre virusit agresiv.
Por lista e medikamenteve në shtetin fqinj është zgjeruar dhe me disa emra të tjerë, që ashtu si Tocilizumab, supozohet të jenë prezentë dhe në Shqipëri për trajtimin e sëmundjeve të tjera.
“La Stampa” shkruan se medikamente si Kaletra e përdorur nga pacientët me HIV dhe Chloroquina e përdorur për malarien që ka kosto fare të ulët, kanë nisur përdorimin në spitalet itraliane e këtë e dëshmon dhe Protokolli Terapeutik për spitalet e zonës së Lombardisë, epiqendrës së COVID-19 në Itali.
Një tjetër medikament i përfshirë në trajtimin e Remdisivir që u provua i pasuksesshëm në trajtimin e Ebolës, po përdoret tashmë në Itali për pacientët me koronavirus me komplikacione të rënda.
Për trajtimet me këto medikamente, mjekët italianë po bazohen në eksperiencën e atyre kinezë duke qenë se koha nuk premton për studime të imtësishme.
Por fakti që këto medikamente kanë rezultuar të suksesshme në raste të shumta e në rastin e Tocilizumab janë aprovuar nga mjekësia, do të thotë se dhe mjekët shqiptarë, në mos kanë nisur përdorimin e tyre tek të prekurit, do ta nisin shumë shpejt. Duke qenë se në vendin tonë ka të prekur me HIV që trajtohen me Kaletra e po ashtu ndër vite ka pasur raste me malarie për të cilat nevojitet Chloroquina, është e qartë se këto medikamente gjenden në vendin tonë, e po ashtu dhe Tocilizumab (Actemra).
Megjithatë, pyetja në këtë rast është nëse këto ilaçe gjenden në sasi të konsiderueshme për t’i bërë ballë epidemisë së koronavirusit, që sikurse u shpreh dhe vetë kryeministri Rama, në dy javët në vazhdim do të ketë një përhapje edhe më të madhe.
Gjithashtu, mungesë të theksuar informacioni ka dhe për ventilatorët, që janë të domosdoshëm për pacientët që paraqesin komplikacione të rënda. Vetëm pak kohë më parë, shefi i Kardio-Kirurgjisë në QSUT Edvin Prifti u shpreh se në të gjithë Shqipërinë, gjenden vetëm 140 ventilatorë, numër ky tërësisht i pamjaftueshëm për t’i bërë ballë një epidemie si kjo e COVID-19 dhe për ta kuptuar këtë, mjafton të shohësh kolapsin që pësoi sistemi shëndetësor italian, ndër më të shkëlqyerit në Europë.
Ndaj në një situatë të tillë emergjence, ku minutat e orët janë vendimtare për të ndërmarrë të gjitha veprimet që do të vulosin fatin e qytetarëve shqiptarë në këtë luftë të vështirë, nevojitet jo vetëm lëvizja sa më e shpejtë, por edhe transparenca e institucioneve publike.
