Ish-kryeministri Sali Berisha ka paralajmëruar protestë ditën e shtunë, datë 8 Janar, për të nxjerrë Lulzim Bashën nga selia e PD-së. Protesta ka nisur pikërisht në orën 12:00 në momentin kur dera kryesore e selisë është hapur me forcë nga protestuesit.
Zyrtarët policorë kanë filluar që të hedhin gaz lotsjellës dhe ujë drejt protestuesve, në përpjekje për t’i shpërndarë ata.
Ndërkohë pas këtij veprimi ish-lideri i PD-së, Sali Berisha ka folur para mediave duke kërkuar qetësi nga të gjithë mbështetësit e tij që janë mbledhur për të protestuar përpara selisë së partisë demokratike.
Më herët anëtari i kryesisë, Roland Bejko nuk u lejua të hyjë në seli pasi në oborrin e selisë ai filloi të sulmohej nga protestuesit dhe u detyrua të kthehet pas.
Ka pasur edhe hedhje gazi lotjsellës në selinë e PD-së nga mbështetësit e Bashës, ndërsa disa protestues po tentojnë që të arrijnë në katin e dytë të ndërtesës.
Menjëherë pas kësaj situate të krijuar ka reaguar Presidenti i Shqipërisë, Ilir Meta i cili bëri thirrje protestuesve për shmangien e akteve të dhunës,provokimeve dhe tensioneve të panevojshme.
Ish-kryeministri Berisha dhe Komisioni për Rithemelimin e PD-së i kishin lënë afat deri në datën 5 Janar Lulzim Bashës që të lironte paqësisht zyrën e tij.
