Studentët vijojnë të qëndrojnë në të ftohtë, përpara godinës së Kryeministrisë duke kërkuar miratimin e tetë kërkesave te tyre në ditën e tetë të protestës. Pak orë më parë, kryeministri Rama në rrjetet sociale e cilësoi ditën e sotme si një ditë e humbur kot për ta, teksa nuk pranuan të negocionin!
Mirëpo kryeministri ka reaguar sërish! Këtë herë në “InstaStory”, duke publikuar një foto të tij duke buzëqeshur. Madje, Rama ka përdorur edhe trendin më të ri në “Instagram”, atë të “Më bëj një pyetje”, ku pyet 229 mijë ndjekësit e tij “Kur do flasim?!”
Sakaq, të rinjtë në shesh po mundohen të luftojnë me temperaturat e ulëta duke ndezur zjarr përpara Kryeministrisë. Ata kanë paralajmëruar se nesër në orën 10.00 do te mblidhen përpara Parlamentit.
