Në përmbushje të misionit të saj kushtetues dhe ligjor për hedhjen në qarkullim të monedhës kombëtare dhe ruajtjen e besueshmërisë së saj, Banka e Shqipërisë ka vendosur të nxjerrë në qarkullim serinë e re të përmirësuar të kartëmonedhave shqiptare me kurs ligjor.
Banka e Shqipërisë bën me dije se në duart e qytetarëve nga 17 janari i vitit të ardhshëm do të qarkullojnë dy kartëmonedha të reja.
Bëhet fjalë për prerjet 500 dhe 2000 lekë, të cilat do të qarkullojnë paralelisht me kartëmonedhat e serisë aktuale dhe janë të dizajnuara me teknologjinë më të fundit të fushës dhe janë të pajisura me elemente bashkëkohore dhe të sofistikuara sigurie.
Kartëmonedhat 200 Lekë dhe 5000 Lekë u hodhën në qarkullim duke filluar nga data 30 shtator 2019.
Kartëmonedhat 10000 Lekë dhe 1000 Lekë do të hidhen në qarkullim duke filluar nga 30 qershor 2021.
Kartëmonedhat përmbajnë një sërë elementesh sigurie që i mbrojnë nga falsifikimi dhe ruajnë besueshmërinë e publikut tek paraja.
Përmirësimi i serive të kartëmonedhave me qëllim forcimin e elementeve të sigurisë dhe njëkohësisht përmirësimin e dizajnit është një praktikë e njohur në bankat qendrore, që përgjithësisht zbatohet çdo 15-20 vjet.
Pamja e serisë së re përfaqëson evoluim dhe përmirësim të dizajnit të përgjithshëm dhe elementeve specifike të paraqitura në to. Koncepti kryesor, për sa i përket paraqitjes së tyre, ka qenë krijimi i një serie kartëmonedhash bashkëkohore, pamja e të cilave mbështetet në një ekuilibër ndërmjet të resë dhe traditës.
