Miliona udhëtarë në Shtetet e Bashkuara mund të përballen me vonesa dhe anulime masive fluturimesh këtë fundjavë, pasi mbyllja e pjesshme e qeverisë amerikane po paralizon sektorin e aviacionit. Administrata Federale e Aviacionit (FAA) ka paralajmëruar një ulje deri në 10% të fluturimeve në 40 nga aeroportet më të ngarkuara të vendit, nëse situata nuk zgjidhet deri të dielën.
Kriza ka detyruar kompanitë ajrore të rishikojnë oraret dhe të reduktojnë numrin e fluturimeve për të përmbushur kufizimet e reja të trafikut ajror. Delta Air Lines ka anuluar rreth 170 fluturime, United Airlines mbi 200, ndërsa American Airlines dhe Southwest kanë njoftuar qindra anulime shtesë gjatë fundjavës.
Sipas FAA-së, masat janë të domosdoshme për të shmangur mbingarkesën e sistemit ajror dhe për të garantuar sigurinë e pasagjerëve. Administratori i FAA-s, Bryan Bedford, tha se reduktimet do të jenë graduale, me 4% më pak fluturime që nga e premtja dhe deri në 10% në fund të javës nëse mbyllja vazhdon.
Ndërkohë, linjat ajrore u kanë bërë thirrje pasagjerëve që të kontrollojnë statusin e fluturimeve përpara nisjes dhe të jenë të përgatitur për vonesa të gjata. Ekspertët paralajmërojnë se, nëse qeveria federale nuk arrin një marrëveshje së shpejti, udhëtimet ajrore në SHBA mund të përfshihen në kaos, me ndikime që mund të zgjasin për javë të tëra.
