Shkolla private “Udha e Shkronjave” në Tiranë ka marrë vendimin për t’u mbyllur pas frikës nga Koronavirusi.
“Ky vendim nuk duhet parë si reflektim i ndonjë informacioni konfidencial, por si pjesë e dyshimit tonë. Do të thotë që ne nuk kemi informacione më shumë se sa jepen në publik dhe sa dini ju, por marrim masa të natyrshme që prindërit të kenë kohë të marrin masa edhe më të forta në rast se është e nevojshme”, njoftoi shkolla më herët.
Por pas këtij vendimi, ministrja Besa Shahini ka reaguar dhe ka thënë se shkollës do t’i hiqet licenca pasi ka përhapur panik.
“Shkolla mbyllet jashtë planit të vitit shkollor VETËM me urdhër ministri. Udhëheqësit e një shkolle private kishin vendosur të mos respektonin këtë dhe e kanë mbyllur shkollën për 2 javë. Në kushte të kësaj paligjshmërie, jemi të detyruar që shkollës t’ia heqim licencën.
Nxënësit do të transferohen në një shkollë tjetër. Ndërsa udhëheqësit e shkollës që përhapin panik duke mbyllur shkollën në mënyrë të jashtëligjshme, për gjoja parandalim të një situate virale e cila NUK ekziston në Shqipëri, duhet të ndiqen nga organet e drejtësisë”.
Në vendin tonë ka filluar të përhapet paniku pasi Koronavirusi ka mbërritur tashmë në Itali, duke shënuar 4 viktima dhe mbi 200 persona të prekur!
