Qeveria federale e Shteteve të Bashkuara ka hyrë zyrtarisht në mbyllje administrative pasi mesnatës së së martës nuk u arrit kompromis mes republikanëve dhe demokratëve në Kongres për buxhetin e vitit të ri fiskal. Sipas sistemit amerikan, më 1 tetor çdo vit Kongresi duhet të miratojë financimin për agjencitë federale ose të votojë një zgjatje të përkohshme. Në mungesë të saj, shumë agjenci ndalojnë pjesërisht apo plotësisht veprimtarinë.
Shërbimet thelbësore si policia, patrullat kufitare, kontrollorët e fluturimeve dhe spitalet federale vijojnë punën, por qindra mijëra punonjës federalë vendosen në pushim të detyruar pa pagesë, duke shkaktuar efekte zinxhir në ekonomi dhe në shërbimet publike. Preken parqet kombëtare, muzetë, monumentet publike, inspektimet ushqimore, programet për fëmijët, procesimi i kredive studentore dhe aplikimet për përfitime sociale, ndërsa pagesat për kuponët ushqimorë mund të ndërpriten nëse mbyllja zgjat.
Pensionet dhe programi federal i kujdesit shëndetësor Medicare vazhdojnë, por aplikimet e reja mund të mbeten pezull. Mbyllja më e gjatë në historinë amerikane ndodhi në vitin 2018 dhe zgjati 35 ditë, me një kosto prej 11 miliardë dollarësh për ekonominë.
Nëse kompromisi nuk arrihet së shpejti, analistët paralajmërojnë për pasoja më të thella në ekonomi dhe në shërbimet publike, ndërsa kjo krizë buxhetore shihet si një shembull i përsëritur i ngërçeve politike në sistemin amerikan.
