Drejtori i Emergjencave Civile, Haki Çako, ditën e sotme ishte i ftuar në emisionin “Kjo javë” në “News 24”.
Ai foli për operacionet e kërkim-shpëtimit që janë bërë pas tërmetit të fuqishëm në 26 nëntor. Çako tregoi mes emocionesh dhe disa nga momentet e vështira gjatë operacioneve.
Ndër të tjera drejtori i Emergjencave Civile, rrëfeu dhe operacionin për shpëtimin e Klajdi Qatos, ku tha se ishte një tra i kishte bllokuar daljen.
“Grupet tona kishin mundësuar krijimin e një hapsire, e një tuneli deri në mbërritjen e Klajdit, djalit që u shpëtua por pozicioni i tij ishte shumë i vështirë pasi një tra i vendosur në mënyrë horizontale në pjesën e krevatit e kishte mbyllur ose e kishte kufiziuar mundësinë e daljes. Gjithëka u mundësua falë durimit dhe profesionalizmit të ekipeve greke që krijuan terrenin e mjaftushëm për ta shpëtuar”, tregoi ndër të tjera Haki Çako.
25-vjeçari Klajdi Qato shpëtoi mrekullisht nën rrënojat e hotelit të tij “Vila Palma” në Shkëmbin e Kavajës.
Ai ndodhej së bashku me dy gjyshërit mbrëmjen e të hënës në hotel dhe të nesërmen do të fluturonte drejt të fejuarës së tij.
Për fat të keq gjyshi i tij nuk u nxorr dot i gjallë nga rrënojat.
