Sipas meteorologëve, i nxehti afrikan ka prekur të gjithë Ballkanin, por zona më e rrezikuar ka qenë Jugu i Italisë. Kjo verë pritet të jetë rreth 2 gradë mbi mesataren. Është e vështirë të thuhet që tani nëse këto ditë do të mbeten ditët më të nxehta të verës 2017, por meteorologët bëjnë thirrje për kujdes nga ana e qytetarëve.
Ja çfarë duhet të bëni nëse keni këto simptoma!
Problemet me shëndetin mund të shfaqen me simptoma minore sikurse krampe, lipotimi (gjendje të fikti) dhe edema ose me simptoma më të rënda si stresi nga i nxehti, dehidratimi dhe simptoma më e rëndë që shfaq dhe urgjencë mjekësore, por fatmirësisht edhe më e rrallë “ Goditja nga i nxehti”
Krampet– Janë dhimbje të forta muskulore të cilat shkaktohen nga çrregullime elektrolitike, si pasoje e humbjes së lëngjeve dhe kripërave. Janë më të shpeshta te të moshuarit dhe kryesisht gjatë natës. Personat mund të shfaqin dhe simptoma të tjera si, dhimbje koke, dobësi trupore, lodhje. Zgjidhja është sa më shumë lëngje dhe kripëra.
Lipotimia ( gjendja e të fiktit)– Karakterizohet nga humbje e ndërgjegjes, zakonisht paraprihet nga marrje mendsh, djersë të ftohta, errësim të shikimit, vjen si pasojë e mos furnizimit mjaftueshëm me gjak të trurit, nga tensioni i ulet arterial. Duhet që në këto raste të shtrihet personi .
Stresi nga i nxehti– Manifestohet me një ndjesi çorientimi, dobësi të përgjithshme, të vjella, rrahje të shpeshta zemre, ulje të urinimit gjate ditës, djersë të shumta. Shpesh kjo situatë diagnostikohet me një gjendje virale. Trajtimi konsiston në largimin e pacientit në një ambient të freskët dhe dhënia e lëngjeve më përmbajtje kripërash dhe sheqernash. Në raste më të rënda, të sëmurit i largohen veshjet dhe shpëlahet me ujë të freskët, mund të ndihmojë dhe mbështjellja me një çarçaf të lagur.
Goditja nga te nxehtit – Është një situatë e mirëfilltë urgjence. Kjo shfaqet kur personi e humbet aftësinë fiziologjike për të rregulluar temperaturën e trupit dhe vlerat arrijnë rreth 40 gradë. Mund të shfaqet me vështirësi në frymëmarrje, probleme kardiake, problem me mushkëritë. I sëmuri duhet dërguar menjëherë në urgjencë.
Kongjestioni– Kjo shkaktohet në momentin që personat marrin pije shumë të ftohta me akull, ndërkohë që organizmi i tyre është i nxehtë. Personi shfaq djersë të ftohta dhe dhimbje gjoksi. Trajtimi do të ishte ndalimi i çdo aktiviteti, largimi i tij në një vend të ngrohtë dhe të thatë. Nëse situata nuk përmirësohet duhet kërkuar ndihma e mjekut.
Dehidratimi- Dehidratimi është një situatë kur sasia e ujit të humbur nga organizmi është më e madhe se ajo e marrë. Normalisht në marrim rreth 1.5 l ujë në ditë, si rrjedhojë e stimulimit të etjes. Organizmi dehidratohet dhe fillon të keqfunksionojë kur kërkesat për ujë janë më të larta. Pacienti ka etje, dobësi, marrje mendsh, rrahje të shpeshta zemre, ankth, lëkura dhe gjuha e thatë, tensioni i ulët. Parandalimi i kësaj situate është marrja në këto periudha të nxehti, rreth 2 l ujë dhe lëngje në ditë, edhe në mungesë të stimulit të etjes.
Bëni kujdes me veshjen dhe ushqimet
Duhet të kemi parasysh të mos dalim në ambientin e jashtëm në oraret e pikut, ora 11-18. Veshja të jetë e lehtë me materiale si, pambuk, lino, veshje të lirshme dhe me ngjyra të hapura, gjithashtu të mbahet kapele. Temperaturat optimale të kondicionerit në ambientet shtëpiake, duhet të jenë rreth 24-26̊C.
Të evitohen vaktet e bollshme, të evitohen pijet alkolike dhe me përmbajtje kafeine. Ushqimi të shpërndahet në 4-5 vakte. Të evitohen ushqimet pikante, ushqimet me yndyrna të tepërta, mishi i kuq, lëngjet me gaz dhe përmbajtje sheqeri. Të përdoren sa më shumë perime, sallatat dhe lëngje frutash të stinës./dritare.net
